Manchester United an chak lo
Jose Mourinho hnuaia Manchester United-in Europa League an khelh hmasak berah Feyenoord 1-0 in an hneh lo. Season liam ta khan United-in Louis van Gaal-a hnuaia UEFA Champions League an khelh hmasak berah Dutch club PSV Eindhoven an lo hneh tawh lo bawk a, group stage patlang zo loin Europa League-ah an hmelma Liverpool hneh loin an tla zui bawk.
Ningani zan Europa League inkhel dangah Premier League club Southampton-in an mualah Sparta Prague chu 3-0 in an hneh a, Saints tan hian Charlie Austin-a'n goal hnih a khung bakah Jay Rodriguez-a'n hun tawp hma hretin a pet goal leh bawk.
Pogba telna
Manchester United tan khaw--vel player manto ber Paul Pogba-a'n inkhel bul ṭan mah se Jose Mourinho-a'n Manchester Derby-a inkhel bul ṭantu zing aṭangin player pariat zet a thlak danglam.
De Kuip, Rotterdam-ah player manto rual United-in an
ṭha zawk tih an lantir thei lo a, first half-a Anthony Martial-a chance hlah bak goal khung theihna tur hun ṭha an nei lo. Minute 63-naah Zlatan Ibra-himo-vic, Memphis Depay leh Ashley Young te chu a rualin rawn lut ṭhawt mah se dang-lamna an thlen thei chuang lo.
Ander Herrera leh Morgan Schneiderlin ten midfield
aṭangin hlawk takin ball an sem thei lo, midfielder manto Paul Pobga lah striker hnungah zalenna pek a ni nachungin player naran aia a ṭhatna hmuh tur a vang hle. Ball ṭha hmu tam lo Marcus Rashford-a'n tun season-a inkhel bul a ṭan hmasak berah coach mit a tlung lo a, Juan Mata leh Martial te nen minute 63-naah thlak an ni.
Goal khat a tawk
Minute 11 chiah khelh tur a awm tawh tihin counter attack hmangin Feyenoord-in an nawr let a, Nicolai Jorgensen cross chu Tonny Vilhena-a'n cool takin a khung. Dutch club chak nan goal khat a tawk a, goal luhna tura ball petu Jorgensen a offside avangin United tan erawh a lungawi thlak loh thung.
United hnehtu Feyenoord manager hi Arsenal leh Bar-celona left-back hlui Giovanni van Bronckhorst a ni a, captain Dirk Kuyt lah Red Devils
ṭantu tan theihngilh theih a ni lo. Kuyt hian Liverpool tana a khelh laiin kum 2011 khan Anfield-ah United lamah hattrick a siam a, kum 36-a upa a nih hnuah pawh United tan buaina tham a la tling.
Feyenoord keeper Brad Jones-a'n hna a nei lo a, Aus-tralian keeper hi Liverpool tana khelhna hmun chang pha lo a ni bawk. Player enin Jose Mourinho-a nau te hraw viau mah se Dutch club hi vanduai theihna tur an ni a, tunah hian Eredivisie-ah vawi nga khel tawhin an la chak vek a, league hmahruaitu an ni mek.
Mourinho insawifiahna
Manchester Untied manager Jose Mourinho chuan, "Kan bul ṭan danah ka lawm lo. In-khel thununin chak ngei tum mah ila kan khingpuiten point hlawhchhuah hrim hrim an tum avangin khelh an harsa a ni. An goal khung danah chiang taka an offside avangin kan vanduai a, anni erawh an vannei thung. Mimal khelh dan sawi zui ka duh lo a, ka player-te zingah khel ṭha leh
ṭha lo deuh an awm tih pawh ka hria. Amaherawhchu ṭhenkhat chu tun season-a an vawi khat inlanna chauh te a nih avangin ṭha taka khelh a harsa a ni," tiin a inkhel chungchang a sawi.
United hian Pathianni tlai dar 4:30 hian Vicarage Road-ah Watford an tlawh dawn a, hemi chungchang hi sawiin Mourinho chuan, "Premier League ṭha taka kan khelh theih nan Valencia leh Shaw te kan hruai tel lo a, team thlak danglam loin player ngaiin Watford kan hmachhawn thei ang," tiin Premier League a ngaih pawimawh thu a sawi. Feyenoord laka chak lo United team-ah hian Antonio Valencia leh Luke Shaw bakah captain Wayne Rooney telh an ni lo.
Penalty inchuh
Southampton-in Sparta Prague an mikhual ṭumin minute ngana lekah Charlie Austin-a'n penalty a hlawh chhuak a, Saints forward Austin leh midfielder Dusan Tadic ten pet an inchuh. English striker hian penatly hi petin Serbian midfielder hian a lawmpui tho a, Saints hi 3-0 in an chak zui bawk.
Tun ṭum hi manager thar Claude Puel hnuaia an vawi khat chakna a ni a, Pathianni zan hian St Mary's Stadium-ah Swansea City an mikhual ang.
Europa League Results
Group A
Feyenoord 1 - 0 Manchester United
Zorya 1 - 1 Fenerbahçe
Group B
Young Boys 0 - 1 Olympiakos Piraeus
APOEL 2 -1 Astana
Group C
Mainz 05 1 - 1 Saint-Étienne
Anderlecht 3 - 1 Qabala
Group D
AZ 1 - 1 Dundalk
Maccabi Tel Aviv 3 - 4 Zenit
Group E
Viktoria Plzen 1 - 1 Roma
Astra 2 - 3 Austria Wien
Group F
Rapid Wien 3 - 2 Genk
Sassuolo 3 - 0 Athletic Bilbao
Group G
Standard Liège 1 - 1 Celta de Vigo
Panathinaikos 1 - 2 Ajax
Group H
Konyaspor 0 - 1 Shakhtar Donetsk
Sporting Braga 1 - 1 Gent
Group I
Salzburg 0 - 1 Krasnodar
Nice 0 - 1 Schalke 04
Group J
Qarabag 2 - 2 Slovan Liberec
PAOK 0 - 0 Fiorentina
Group K
Internazionale 0 - 2 Hapoel Be'er Sheva
Southampton 3 - 0 Sparta Praha
Group L
Osmanlispor 2 - 0 Steaua Bucharest
Villarreal 2 - 1 Zurich