MSN nena training hlawktitu Umtiti

Barcelona defender Samuel Umtiti chuan Lionel Messi, Luis Suarez leh Neymar te nena training neih ṭhin chu hma-sawn nan hlawk a tih thu a sawi chhuak.

Kum 22-a upa Umtiti hian kumin nipui transfer lai khan Lyon
aṭangin La Liga champion hi pound maktaduai 21-in a zawm a, Catalan club tan hian league match vawi hnihah a inlan tawh. France international hi a kum a la tam lo bawk a, player ṭha tak chu ni tawh mah se hmasawnna tur a la nei nual ang tih a chiang.

Umtiti chuan, "Messi, Neymar leh Suarez te nena training hi nuam ka ti a, kan khingpuite lo dan dan tur chu anni hnen aṭang baka zirna tur ṭha a awm chuang lo," tiin khawvela tlarhma inkawp fuh ber pathum lak aṭanga thil a zir hnem thu a sawi.

Messi fak chhun-zawmin, "Messi hi hruaitu a ni a, khawvel a player ṭha ber a ni bawk. Ani hi chu a bik a duan a ni," tiin Barca star a fak nasa hle. Umtiti hian Champions League nomawi an chawi a nih chuan a player ngaihsan Messi leh Neymar te anga a sam a tih var ve tur thu a sawi bawk.

Barcelona hian tun season-ah league match vawi thum khel tawhin a hmasa pahnihah Real Betis leh Atletico Bilbao te hneh mah se an match hnuhung berah rin loh takin kaithar Alaves 2-1 in an hneh lo. Vawiin tlai dar 4:30 hian Leganes khel turin an zin chhuak dawn - Champions League-a Celtic 7-0 a sawptu team hi mikhual thlen chakawm tak an ni lo ang.