Joey Barton-a'n ngaihdam a dil

Rangers midfielder Joey Barton chu club training naah a player pui nen an inhnial buai avangin Thawhṭannin thleng club training a zawm phalsak a ni lo. A nungchang mawi lo vanga chanchin lo nei fo tawh Barton hi Old Firm derby-a Celtic laka 5-1 a an tlawm hnuah a team-mate Andy Halliday nen an inhnial buai a, kum 34-a upa midfielder hian ngaihdam a dil tawh thung.

Newcastle leh Manchester City midfielder hlui chuan, "Ka thusawi ṭhenkhat kha chu sawi ṭul lo tawp a ni a, mawi lo taka ka chetna avangin ngaihdam ka dil a ni. Thil thleng duhawm lo tak avang khan ka inchhir em em a, training ka zawm leh hunah theihtawp ka chhuah chhunzawm lehnghal ang," a ti.

Barton chuan sawi chhun-zawmin, "Khang thil thleng zawng zawng kha result ṭha zawk beisei vang, kha aia ṭha zawka khel tura keimawh ngei pawh ka inbeisei vang a ni. Ngaihdam ka dil avangin ka thiam lo tihna a ni lo a, a chang chuan mahni inchhuanna ai chuan club inpawhna hi a pawimawh zawk a ni," tiin a thiam zawk a nih thu a la sawi hram!