Shah Rukh vanga buai lo Ganguly

Bollywood actor hausa leh huhang ngah Shah Rukh Khan-a'n Mohun Bagan lei a tum hnai nia sawi a ni a, Atletico de Kolkata neitu zinga mi India cricket team captain hlui Sourav Ganguly chuan SRK-a thuthar vanga a buai phah loh thu a sawi.

Kum 2018 aṭanga ṭan turin All India Football Federation (AIFF) chuan Indian Super League chu India rama league sang ber nih tir a tum a, he inelnaah hian Kolkata club lian Mohun Bagan leh East Bengal pawh hlan chhoh tura beisei a nih avangin ATK-in fans an nei tlem sawt tura ngaih a ni.

Ganguly chuan, "Engkim hi a nih tur ang ni phawt se, a chiang thuai ang chu. Tun dinhmunah chuan ATK chiah hi ka ngaihtuah a ni. Season hmasa semifinal kan khelh kan kan inkhel en turin mipui 75,000 vel an pungkhawm thei a, Mohun Bagan emaw East Bengal nen kan inhmachhawn hunah chuan an tam lehzual ang," tiin a eng zawngin a thlir.

Prince of Kolkata hming lem an pek Ganguly chuan sawi chhunzawmin, "Shah Rukh Khan hi chuan a kalna apiangah hlawhtlinna a chang zel a, Mohun Bagan tan SRK hi a ṭha khawp ang," tiin a sawi a, season tharah Kolkata club hi Shah Rukh Khan-a hnuaiah a awm a nih pawhin a mak lo ang