Champion lai goal 3 nen
Aizawl FC-in Mizoram Premier League Season 5 an khelh hmasak berah goal thum an khung nghal a, K. Malsawmkima hote tum chu a zawna vawi thum champion hmasa ber nih a ni.
Ningani zanah MPL cham-pion laiin Lalramchullova, Bran-don VL Remdika leh William Lalnunfela te goal hmangin Zo United 3-0 in an sawp. Man of the match-ah penalty aṭanga goal hmahruai khungtu Armed Veng tlangval Chullova thlan a ni.
An chul lo
Aizawl FC-in Durand Cup final an thleng zo lo a, semifinal-a an hneh loh Army Green captain PC Lallawmkima pawhin Mizo club laka an vanneihthu hi a pha lo. Delhi-ah nomawi chawi thei lo mah se I Day Football leh MFA Super Cup-a champion thei AFC an la chul lo a, an match hmasa ber aṭangin champion zia an chhuah nghal.
Minute hnih em pawh a ral hmain Zo United defender Mal-sawma Chhangte-in ball kang lai bin a tumna lam-ah AFC forward Bright Middleton Mends a pet fuh a, referee-in penalty spot kawh mai loh chu tih theih a nei lo. AFC deadball specialist Chhullova'n Zo United keeper LK Lalhmangaihzuala (Mama) bumin goal hmahruai a khung.
Zo United-in Chanmari West aṭanga an lakluh forward Lal-nunsanga (Talea) inhliam an tuar tih a lang a, Lalruatthara tel lohna AFC tlarhnung an su nghing meuh lo - minute 90 chhung-in goal zawnah ball an pet lo.
Goal ropui
Aizawl FC chak nem-ngheh-na goal chu Brandon VL Remdika khung a ni a, Hunthar tlangval hian metre 23 vel
aṭangin ball inchuh per kang chu leia a tlak hmain a hlap pawp a, Zo United goal-ah a kum lut.
Minute 45-naa Brandon-a goal hian Zo United beiseina a titawp a ni ber a, hun tawp hma minute riat chiah awmah Chullova freekick chu keeper Mama'n a dan per avangin awlsam takin William Lalnunfela'n a tauh goal leh bawk.
Aizawl FC-in inkhel an thunun a, goal zawna vawi 13 an pet theih avangin point thum hlawhchhuah hi an phu an ni.
Zo United lam
Goal an chhuah hma an tuar a, tho leh turin an goal nawr a na tawk lo - striker an nei lo.
Minute 30-naah winger Lalhmangaiha ball vawrh luh chu Chhanrinpianga'n ṭha takin lalut mah se Chullova'n a tihtluk vangin tih theih a nei lo - referee-in penalty a pe lo. Zo United hian an khingpuite angin penalty hmu ta se inkhel result a dang thei a, khelh ṭhat loh niah point hmu thei an ni.
Zo United coach Vanlalrova chuan, "Penalty kan chawi avangin engkim a danglam a, kan khel ṭha lo a ni. Aizawl FC-in chak an phu zawk a, keini erawh team ṭha laka result ṭha nei turin kan thawhrim a ṭul a ni," tiin a sawi.
Mala a lawm
Aizawl FC coach Mala chuan, "Kan match hmasa bera kan chak hi kan lawm hle a ni. Vanduai kan hlau a, point hmuh loh palh kan hlau. Lalruatthara awm loh vangin hlauhthawnna kan nei a, amaherawhchu engkim kan duh ang thlapin a kal a ni. Kan tlarhnung a khawng ṭha em em a, player-te pawh an khelṭha takzet a ni," tiin an khelh dana a lungawi thu a sawi.
Mizorama inelna lian MPL, I Day Football leh MFA Super Cup-a Aizawl FC champion pui vektu coach Mala chuan, "Pathian zarah hlawhtlinna duhawm tak tak kan chang a, league match hmasa bera kan chak chhan pawh hi Amah vang liau liau a ni," tiin a sawi.
Ngaihnawm
• MPL club pariat ten point an hmu vek tawh
• AFC hi MPL-ah match ruk chhung a zawnin an chak tawh
• Tualchhung inelna bikah AFC-in match 10 chhung hneh loh an tawng tawh lo.
Tute nge inlan?
Aizawl FC (4-3-3) : Zothanmawia; Lalhriatrenga, Lalramchulova, Lalṭhakima, Ricky Lallawmawma; Lalnuntluanga (Rohmingthanga 58'), H. Lalbiakthanga, B. Zoramthara; Vanlalduatsanga, Bright Middleton Mends (Rochharzela 78'), Brandon VL Remdika (William Lalnunfela 39').
Zo United (4-2-3-1) : LK Hmangaihzuala; Vanlalruata, Rosangzuala, Malsawma Chhangte, R. Lalthantluanga; Hmingthanzaua (Vanlalremsanga 57'), C. Laldinmawia; Lalṭhazuala, Chhanrinpianga, Laldinliana Varte; Jesse Laldinpuia (Lalbiakkima 83').
ZoFooty Statistics
Aizawl FC 3 - 0 Zo United
AFC : Lalramchullova 3'(P); Brandon VL
Remdika 45'; William Lalnunfela 82'
MoM : Lalramchullova, AFC
55% Ball Possession 45%
18 Shot(s) 3
13 On Target 0
1 Yellow Card (s) 2
0 Red Card (s) 0
Powered By Rainbow Multibrand
Mobile Showroom
Team Dinhmun
Team Pld W D L GF GA GD Pts
1 Bethlehem VT 2 2 0 0 3 1 2 6
2 Chanmari FC 2 1 1 0 5 2 3 4
3 Chhinga Veng 3 1 1 1 3 4 -1 4
4 Aizawl FC 1 1 0 0 3 0 3 3
5 Chanmari West 3 1 0 2 5 4 1 3
6 Ramhlun North 1 1 0 0 1 0 1 3
7 Zo United 3 0 1 2 0 4 -4 1
8 Dinthar FC 3 0 1 2 1 6 -5 1