City khelmualah Bournemouth

Zanin dar 7:30-ah Manchester City chuan Bournemouth an mikhual dawn a, an khingpui tur manager Eddie Howe berin Etihad Stadium-a chak result hlawh chhuak tur chuan thil mak an thlentir a
ṭul tur thu a sawi a, zaninah 'thil mak' nge 'thleng ṭhin pangngai ve reng' a thleng dawn tih chu a hriat thuai dawn e.

Manchester City-in Premier League match li an khelh tawhah hnehna an la chang fai vek a, inelna hrang hranga vawi sarih an inlan tawhah an chak vek bawk. Hetichung hian manager thar Pep Guardiola chuan league nomawi chawi tur khawpa an la ṭhat tawk loh thu a sawi!

Barcelona boss hlui chuan, "Vawiin thlenga kan khelh dan thlir hi chuan Premier League nomawi chawi turin kan la ṭha tawk lo a ni," a ti a, Spanish manager hian a ngaihdan dik tak a sawi nge a naute pressure nei tur ven a tum? tih chu zawhna awm thei a ni.

Aguero tel loin

Manhcester City-in Champions League-ah Borussia Monchengladbach chu 4-0 in an sawp a, he inkhela goal thum khungtu Sergio Aguero chuan match thum khel lo tura FA lamin an hremna a la hman zawh loh avangin English football lamah a la inlan thei dawn lo.

City-in Argentine striker chhawr thei dawn lo mah se rawlthar duhawm Kelechi Iheanacho an nei a, Nigerian striker hian Gladbach lakah goal khat khungin Europe-a rawlthar duhawm zingah thai bo a thiang tawh lo - kum 19 a upa striker hian City tan inelna hrang hrangah minute 1351 khel tawhin goal 16 a khung a, minute 84.4 dan zela goal khung ang a ni.

Gundogan a dam

Guardiola-a'n Manchester City a zawm ruala a player lakluh hmasa ber chu pound maktaduai 20 man Ilkay Gundogan a ni a, Borussia Dortmund midfielder hlui hian hliam vangin City-a a match hmasa ber chu Champions League-ah a khel ve chauh.

German midfielder hian a match hmasa berah minute 80 khelin vawi 41 pass a neih zinga 81% chu a pass dik a, "a thluak nen a khel a ni," tiin manager Pep-a'n a fak hial - Bournemouth tan Gundogan chanchin hi hriat nuam a ni lo tawp ang.

Hmalam panin

Manchester City-in an league match hnuhnung berah United nen derby an khel a, 2-1 in hnehna an chang. Manager Guardiola chuan, "Match sarih kan khel tawh a, kan la chak vek. Match kan khelh apiang hian hmasawnna hmuh tur a awm zel a ni," tiin a naute khelh dan a sawi a, Bournemouth tan City 'hmasawn lai' dan chah a hautak khawp ang le.