Blues khelmualah Reds an sen lar

Antonio Conte leh Jurgen Klopp intawn hmasak bera dingchang zawk chu German coach a ni - Klopp-a leh a nauten Conte-a hnuaia Chelsea-in siamṭhat an tum mek Stamford Bridge an zawh chim a, 2-1 in hnehna an chang.

Liverpool tan vengtu nei lo Dejan Lovren-a'n minute 17-na lekah hnai set sawt aṭangin a pet lut a, minute 36-naah Jordan Henderson-a'n goal ropui hmangin a chhunzawm ve lehnghal. Yard 25 vel aṭanga captain Hendo goal khung hian Reds fan-te Steven Gerrard a hriat chhuahtir a nih pawn a awm lo hran lo.

Klopp-a'n inkhelh hmaa a naute hnena hlau tura a chah Diego Costa-a'n Chelsea tan second half-ah goal khung mah se Liverpool an ṭang tluan a, champion beisei ngam team pahnih in-hma-chhawnah Reds an chungnung zawk.

German ral lian

Jurgen Klopp-a'n Germany-a sulhnu ropui tak a hnutchhiah hnuah Liverpool a zawm a, German coach enkawlna hnuaia insiamṭhat tum mek Liverpool-in tun dinhmunah chuan kawng dik an zawh mek niin a lang - an league match hmasa berah Arsenal an hneh a, inkhel hmuhnawm taka Tottenham an inhnehtawkpui hnu lawkah champion lai Leicester City chu 4-1 in an sawp a, Blues khelmualah hnehna an chang leh ta.

Klopp-a'n hliam vangin Roberto Firmino a chhawr thei lo a, Brazilian forward ball thiam leh thawkrim tel lo pawhin Liverpool an ṭha tawk. Inkhelh ṭantirh aṭangin Reds hian goal-ah huaisen takin an nawr nghal a, player an tlan tam a, an thawkrim takzet bawk. Sadio Mane-a'n a tlan chakna hmangin player hlauhawm a nihzia a pholang nawn a, Newcastle aṭanga Georginio Wijnaldum laluttu Klopp-a'n tun thleng chuan a la tisual lo tih a lang bawk.

Klopp-a'n nipui bazar-ah left back a lei loh avangin mak tih hlawh mah se James Milner hmangin amah sawiseltute chhanna a pe a, English midfielder hian Liverpool tan vei lam sira a khelh hnuah khelh chhiat a la nei lo.

Conte tan fiahna

Juventus leh Italy manager hlui Conte-a'n chona hautak hmachhawn turin Chelsea a zawm a, Liverpool a mikhual hma zawng chuan a tisual lo niin a lang - Reds a hmachhawn hmaa Conte-a hmaa dingte hi West Ham, Watford, Burnley leh Swansea City an ni a, Italian manager hian manager liantham a hmachhawn hmasak berah hnehna a chang lo nghal.

Chelsea tan tlarhnunga David Luiz awm tawh mah se captain John Terry tel loin London club tlarhnung an la ngaihtuahawm zia a lang nawn a, kum 35-a upa defender kaihhruaina tel loin tawnhriat ngah tawh Nemanja Matic leh Branislav Ivanovic te meuh pawhin beisei an phak lo.

Rei tak si an phurh hnua Conte-a'n minute 83-naa substitution a siam chauh khan mak tih a hlawh a, goal khung beiseia Victor Moses, Pedro leh Cesc Fabregas te a ruala a luhtir ṭhawt laia pound maktaduai 33 man striker Michy Batshuayi bench-a a dah tlat te chu mipui barakhaihtu a ni.

Eng nge an sawi?

Chelsea manager Antonio Conte chuan, "Goal hmasa ber kha chhuah lo tawp tur kan ni a, Lovren kan ven loh chhan kha ka hrethiam thei lo. Team ropui tak anga khelh kan duh a nih chuan game-ah kan rilru zawng zawng kan pe tur a ni. Second half-ah kan khel ṭha tak zet a, Costa kha goal hnih khung thei ni hialin ka hria. Ka player-ten tun aia hma an sawn theih nan ka thawhrim a ngai takzet a, chak lo zawk nih hi chu engtiklai mahin a nuam ngai lo. Kan thawk zel ang a, kan rilru zawng zawng he team tan hian kan seng tur a ni," tiin a naute chu inkhela rilru pe tawk loah a ngai.

Liverpool manager Jurgen Klopp chuan, "Hnehna duhawm tak a ni a, inkhel ṭantirh phat aṭangin kan che vel kha awihawm loh khawpin a hmuhnawm a ni. Chelsea hian hun tawp dawna goal khung an ching em em a, kan lakah erawh chance an nei mumal pawn ka hre lo. Football hmuhnawm tak kan khel a, en a nuam takzet a ni. Second half-ah tlemin talbuai deuh mah ila goal kan chhuah hnuah kan insiamṭha leh nghal thei a, team ṭha tum chuan chetsual chang a awm ve ṭhin," tiin an chak danah a lawm hle.

Inkhel chhehvel

• Liverpool-in Stamford Bridge-a Premier League match an khelh hnuhnung pakuaah vawi nga hnehna an chang thei a, Blues khelmuala an zin hmasak vawi 16-a vawi khat chiah an chak nen chuan a inthlau hle.

• Conte-a'n January 2013 hnuah a vawi khat nan mikhual team a hneh lo ve ta a, vawi 30 hnehna a lo chan zawn tawh chu Klopp-a'n a tihtawp sak ta.

• Klopp-a'n Liverpool a enkawl hnuah box pawn aṭangin league-ah vawi 15 goal an khung a, anmahni hnaih bertu aiin vawi ngain an khung tam zawk.

• Diego Costa-a'n Premier League match ngaah goal nga khungin assist vawi khat a nei tawh.

• Kum 1997-a Arsene Wenger hnuah Jurgen Klopp hi Stamford Bridge-a a len hmasak vawi hniha chak result hlawh chhuak thei hmasa ber a ni.