Saul Alvarez a kal zel

Mexican boxer rothap Saul 'Canelo' Alvarez chuan nimin zing khan British boxer Liam Smith chu round kua naah knockout-in WBO light-middleweight title a kawl lai chu a chhuhsak.

Kum 26-a upa Alvarez hian round sarihnaah pawh Liam Smith hi a hnek tlu tawh a, hnehna chan let ngei tumin Smith tho leh mah se round kuana thleng bak a daih ta lo a ni. Kum 28-a upa Smith tan tun hi inhnek a hmachhawn vawi 25-a a tlawmna hmasa ber a ni.

Alvarez chuan inhnek zawh rualin WBC, WBA leh IBF middleweight champion Gennady Golov­kin cho nghalin, "Mihring tumah hlauh ka nei lo a, he infiamna huangah hian a ṭha ber chu keimah ka nih avangin ṭha ve nia in­ngai chu hmachhawn zel ka duh. Thla hmasa lawk khan Golovkin hi vawi li vel chu inhnek puiah ka sawm tawh," tiin a ṭawng pawr hle.

Kum 34-a upa Kazakh Golovkin hian kar hmasa lawk khan British boxer Kell Brook hnehin vawi 36 inhnek a hmachhawn tawhah mi 33 knockout tawhin tlawm hmel a la hmu lo. Amah chotu Alvarez hian vawi 50 inhnek hma­chhawn tawhin vawi khat chiah a tlawm thung a, a hneh loh awmchhun hi Floyd Mayweather a ni.