Hull ngam loh Sanchez

Alexis Sanchez-a goal hnih khung hmangin Arsenal chuan Hull City 4-1 in an sawp. Gunners forward hian inelna hrang hranga Hull a hmachawn hnuhnung vawi ngaah goal ruk a khung - Inrinni zan Premier League inkhelah hian penalty hlah lo phei se hei aia chak chiang thei dinhmunah an ding.

KCOM Stadium-a inkhelah mikhual Arsenal an hlauhawm zawk a, minute 17-na lekah Alex Iwobi-a'n goal a khung niin lang mah se goal a luh hmaa ball khawih hnuhnung bertu Sanchez chu a khungtua pawm a ni zawk. Minute 40-naah Hull midfielder Jake Livermore-a'n handball vangin penalty a chawi a, hnawhchhuah a ni bawk. Arsenal tan goal hmahruai khungtu Sanchez chuan petin Hull goalkeeper Eldin Jakupovic-a'n a dan sak.

Second half-ah Iwobi siamsak hmangin Gunners tan Theo Walcott chuan an goal hnihna khungin Hull tan substitute Robert Snodgrass-a'n penalty aṭangin goal khat khung mah se Sanchez-a'n a thungrul zui zat a, hun tawp hma chiahin Granit Xhaka chuan yard 30 a hla aṭangin a ke veilamin goal ropui a khung - Switzerland international hian pound maktaduai 35 man a nih zia a tarlang.

Arsenal hian nikum Christmas hnua a vawi khat nan Premier League-ah a zawnin vawi thum hnehna an chang leh ta a, manager Arsene Wenger kaihhruaina hnuaiah league-ah kaithar team vawi 26 an hmachhawn tawhah chak loh an la nei miah lo bawk, vawi 22 a chak zawkah ṭangin ṭum li chu an inhnehtawk pui.

Arsenal manager Wenger chuan, "Player 11 ve ve kan nih lai pawh khan inkhel kan thunun zawk a, goal kan khung hma bawk avangin point thum hmuh kha kan phu. Champions League khelh zawh hlimah khatianga kan khel chhuak thei kha a lawmawm hle. Kan league match hmasa berah kan rilru fiahna kan tawk a, kha khan min beng harh chiang hle," tiin a sawi.

Wenger hian tlarhnungah Shkodran Mustafi leh Laurent Koscielny a inkawp chhoh tir zelin a rinawm a, tlarhma lamah erawh rilru mumal a la nei lo. Olivier Giroud chu kezungṭang na vangin squad-ah telh a ni lo a, nipui transfer laia a lakluh Lucas Perez chu bench-ah ṭhut tirin minute 87-naah tlan luh tir a ni chauh.

French manager Wenger-a'n a player rem dan aṭangin Perez leh Giroud te chungah rinna a nghat ngam rih lo niin a lang a. Tun dinhmunah chuan Sanchez khelhṭhat tluan lai a nih vangin Arsenal hi goal khung lamah an buai rih lo mai niin a lang a, season hautak hmachhawn chho tur chuan an striker neih te hi an cher hriam a ṭul hle.