Barca leh Atletico chak chiang

La Liga kaithar Alaves laka 2-1 a an tlawm hnuah Barcelona an tawlh thlu nawn tawh lo. Catalan club hian Inrinni tlai khan kaithar tho Leganes chu 5-1 zetin an sawp a, ṭum dang ang thoin MSN chuan goal an khung leh vek.

Barcelona tan Lionel Messi-a'n goal hmahruai a khung hnuah Luis Suarez leh Neymar ten goal khat ve ve khungin an chhunzawm ve leh a, minute 55-naah Messi bawkin penalty aṭanga an goal lina khungin Rafinha chuan minute 64-naah goal ropui hmangin a hnu a khar. Messi goal hmasa leh Neymar-a goal khung hi Suarez siamsak ve ve niin Suarez-a goal khung hi Messi assist a ni thung.

Mualneitu Leganes tan Gabriel chuan minute 80-naah goal khat khung ve mah se Brazilian midfielder freekick ropui hi mualpho zualpui tur hliahkhuhtu mai a ni. Barcelona manager Luis Enrique chuan," Hmun dang ang thoin zanina hnehna kan chan hi a hlu a, theihtawp chhuaha min beihlet tum team lakah harsa takin hnehna kan chang a ni," tiin a ṭawng chapo duh lo.

Inkhel dangah Atletico Madrid pawhin Sporting Gijon chu 5-0 in an sawp. Atletico tan Antoine Griezmann leh Fernando Torres ten goal hnih ve ve an khung a, striker thar Kevin Gameiro chuan goal khat a thawh ve bawk.

Inrinni zan an inkhelh hma lawka Atletico-a a contract ti tawitu manager Diego Simeone chuan, "Team pumpui khelh danah ka lawm takzet a, inkhelh
ṭantirh aṭangin kan khel ṭha nghal em em a ni. A bik takin Griezmann-a'n fak a phu a, Ballon d'Or dawng tur zingah a hming a lan phak ka beisei," tiin a striker a fak nghal.