Ancelotti kaihhruai Bayern an la chak vek

Carlo Ancelotti enkawlna hnuaiah Bayern Munich chuan 100% chak record an nei chhunzawm zel. Inrinni zan khan Bayern hian Bavarian derby-ah Ingolstadt chu 3-1 in an hneh. Bundesliga inkhel dangah Borussia Dortmund chuan Darmstadt 6-0 in an sawp bawk.

Pep Guardiola hmunruak luahtu Ancelotti hian kum thum chhunga Spanish manager tih theih loh German Super Cup a chawi pui tawh a, hei bakah hian league match vawi thumah hnehna chang tawhin German Cup leh Champions League-ah pawh an match hmasa berah hnehna an chang - match ruk an khelh tawhah hnehna an la chang vek.

Kum 1995 khan Otto Reh-hagel chuan Bayern a enkawlna match hmasa parukah hnehna a chanpui vek a, hetiang ang record rawn nei leh thei hmasa ber chu Ancelotti hi a ni. AC Milan, Real Madrid, Chelsea leh Paris Saint-Germain enkawl tawhtu bulṭan dan hi a duhawm hle.

A awlsam lo

Allianz Arena-ah mikhual an tlangnel a, forward Dario Lezcano chuan inkhel ṭan aṭanga minute riatna lekah goal hmahruai a khung! Champion lai Bayern leh keeper Manuel Neuer a barakhaih chiang hle. A zawna season li chhung league champion ni thei Bayern an thochhuak nghal a, goal an phurh aṭanga minute li a liam hnu lehah Robert Lewandowski chuan a chip goal a - chawlhlawk laiin 1-1 in an inhnehtawk.

Euro 2016-a Portugal cham-pion puitu rawlthar duhawm Renato Sanches-a'n inkhel bul-
ṭan mah se beisei a la phak lo chhunzawm zel a, minute 61-naah Thiago Alcantara-a'n a rawn thlak. Khelmual laiah Arturo Vidal a thawkrim a, goal nawr lamah erawh Franck Ribery a thawhhlawk lehpek thung.

France international hlui Ribery thawhrah sengin Xabi Alonso chuan minute 50-naah an goal hnihna a khung. Real Madrid midfielder hlui Alonso hian season hmasa khan league-ah goal khat chiah a khung a, tun season-ah erawh goal hnih a khung der tawh. Goal dang a lut tawh dawn loa a lan hnuah Rafinha chuan hun tawp dawnah kum 2013 hnua a club tana a league goal hmasa ber a khung ve bawk.

Goal lut zat en chuan Ba-yern hi nuamsa taka chak angin a ngaih theih. Mahse, Bavarian derby hi tun season-a inkhel an hmachhawn tawh zinga harsa bera ngaih theih a ni thung. Ingolstadt midfielder Mathew Leckie leh substitute Lukas Hinterseer te goal khung tur ropui taka dangtu Germany keeper Neuer chu Bayern chhan-himtu a ni.

Ancelotti thukhawchang

Kum 57-a upa Ancelotti chuan, "Kan inkhel tam a, player ṭhenkhat inhliam dankawr an la nih bawk avangin hnehna chan zel hi a awlsam lo a, dawhthei taka nghah a ngaih chang a awm, tlarhnung lamah player inhliam kan la neih avangin kan indaih lo a, goal kan chhuah hma bawk avangin inkhel harsa tak a ni," tiin a sawi.

Italian manager chuan sawi chhunzawmin, "A chang chuan mawi leh nalh taka chak zawk nih a harsa a, point hum tur chuan ruahmanna dang kan hman a ṭul ṭhin, vawiin pawh kha chutiang chu a ni," tiin harsa taka hnehna an chan thu a sawi bawk.

Bayern Munich hian goal khung tuma vawi 10 an pet zingah ṭum nga chu goal zawnah a kal a, hetihlai hian an khingpui Ingolstadt hian goal khung tumin ṭum 13 an pet thung a, goal zawnah vawi nga bawk kalin an vanneih ni chu ni se chak zawk thei tur khawpin an khel ṭha ve tho tihna a ni.

Goal khung thiam Dortmund

Champions League-a Legia Warsaw 6-0 a sawp thei Borussia Dortmund chuan Bundesliga lamah pawh goal khung an theihzia an lantir chhunzawm. Inrinni zan khan an khelmualah Darmstadt 6-0 in an sawp zui leh - an match hnuhnung pahnihah goal 12 khungin an lamah a lut miah lo!

Thomas Tuchel-a'n Mario Gotze, Marc Bartra leh Pierre Emerick-Aubameyang te a hahchawlhtir a, hliam vangin Lukasz Piszczek khel thei lo bawk mah se Signal Iduna Park-a inkhelah Dortmund tan hian Gonzalo Castro chuan goal hnih a khung bakah Adrian Ramos, Christian Pulisic, Sebastian Rode leh Emre Mor ten goal khat ṭheuh an thawh bawk.

Kum 2009 May thla hnuah Dortmund hian league-a hnehna an chan chian ber ṭum an tawng a, an khelmualah league match bik vawi 23 chhung zet chu chak loh an nei ta lo. Kum 1965-66 leh 2001-2003 a record an lo siam tawh vawi 24 tlawm loh record tluk turin match khat chiah an hmabawk tawh a, an khelh leh hmasak tur pahnih hi SC Freiburg leh Hertha Berlin te an nih avangin an khum hial mai thei bawk.

Dortmund manager Tuchel chuan, "Goal khung tumin vawi 22 zet kan pet a, kan goal nawr a na hle tih a chiang. Kan khingpui ten tlarhnungah mi panga an tlar chunga goal ruk kan khung thei kha a ropui. Ball possesion kha 73% ngawt kan chan miau avangin kan tan thil harsa a awm lo, a chang chuan football hian min ti na ṭhin mah se hlimna min thlen hnem zawk," tiin a sawi.

Dortmund hian an league match hmasa berah 2-1 in Mainz hneh mah se RB Leipzig lakah 1-0 in an mualpho a, tunah erawh an khingpuite lakah match hnih chhung chu goal an surtir leh ta.