Milan chak ve ta

Italian Serie A-a record nei ṭha ber pawl AC Milan chuan tun season-a a vawi hnih nan hnehna an chang ve ta. Vincenzo Montella enkawl team hian Zirtawpni zan khan khualmualah Car-los Bacca goal khat hmang-in Sampdoria 1-0 in an hneh. Inrinni zan khan Napoli leh Lazio te pawhin hnehna an chang chhunzawm bawk.

Champions League vawi sarih champion tawh Milan hi tun hnaiah an tlahniam hle a, kuminah pawh Europe-ah an inlan phak lo. Tun season-ah Italian manager Montella ruaiin insiam thar an tum a, beisei erawh an la phak rih lo. League match hmasa berah Torino an hneh hnuah Napoli leh Udinese an hneh lo zui a - point ruk hmuin league table-ah pariatna an ni mek.

Milik bawk

Season hmasaa Juven-tus elphak teuh ber Napoli tan striker Arkadiusz Milik chuan goal hnih khungin Jose Callejon-a'n goal khat khung bawkin Bologna 3-1 in an hneh.

Napoli hian season hmasa Serie A top scorer Gonzalo Higuain chu Juventus lakah chan mah se tun dinhmunah chuan Milik an neih avangin league goal 36 khung thei kha an ngai rih lo tawp ang. Ajax aṭanga pound maktaduai 30-a an lakluh kum 22-a upa Milik hian league match liah goal li a khung der tawh.

Inkhel dangah Lazio chuan Sergej Milinkovic-Savic, Ciro Immobile leh Stefan Daniel Radu te goal khat ṭheuh khung hmangin Pescara an hneh ve bawk.