Rio-ah infiammi chesuala thi

Iranian Paracyclist Bahman Golbarnezhad chu Inrinni zan khan Rio Paralympic mipa C4-5 road race inelnaah chesualin damdawi-in hnai ber Unimed Rio Hospital panpui a nih hnuah a thi.

International Paralympic Com-mittee chuan, "A chetsual hnuah a rang thei ang berin damdawi-inah kalpui a ni a, a hun rei lo teah a thi zui," an ti. Kum 48-a upa Golbarnezhad hi London 2012-ah pawh khan a lo inlan tawh a, tunah hian a nupui leh fa pakhat a kalsan.

Kum 1960 Rome Olympic-ah khan Danish cyclist Knud Enemark Jensen chu 100km team trail-ah chesualin a lo thi tawh a, ani hnuah chuan Golbarnezhad hi he infiamna khawmpui liana infiammi chesual thi leh hmasa ber a ni.

International Paralympiuc Committee president Sir Philip Craven chuan, "Thu thar duhawm lo berin min deng a, vanduai ta Bahman chhunghkua leh a ṭhiante ka tawrhpui a, Iran ram pawh kan tawrhpui hle," a ti. Iranian Paralympic Committee chuan an infiammi vanduai ta chu an ui thu leh an ram ti hmingṭha tawhtu an chan mai chu tawrhthiam har an tih thu an sawi ve bawk.

Rio Paralympic-ah hian nimin tlai thleng khan China chuan gold 105 hmain medal table-ah hma an la hruai zel a, anmahni hnaih bertu Britain chuan gold 64 an la tawh. India chuan gold pahnih bakah silver leh bronze pakhat ve ve an la tawh.