PSG an chak chiang

Edinson Cavani goal li khung hmangin Paris St-Germain chuan 6-0 in Caen an sawp a, inkhel dangah Monaco chuan Rennes 3-0 in an hneh ve bawk.

Zirtawpni zan French Ligue 1 inkhelah champion lai PSG tan striker Cavani a inlar a, Uruguayan international hian minute 12, 13, 38 leh 45-ah te goal khungin first half-ah a club te hi point thum a hmuh pui der tawh. Second half-ah Lucas Moura leh Jean-Kevin Augustin te goal khung ve lehin PSG an chak chiang hle.

Season hmasa khan Laurent Blanc kaihhruaina hnuaiah PSG hian point 31 zeta sangfalin league nomawi an chawi a, kuminah manager thar Unai Emery hoin match nga an khelh tawh aṭangin point 10 an hmu a, khelh zat inangah point 13 hmutu Monaco an phak lo mek - a zawna vawi nga champion tur chuan season dang aiin an thawhrin a ngai dawn niin a lang.

Paris Saint-Germain coach Emery chuan, "Inkhel ṭan hmain ka naute hnenah goal chhuah loh a pawimawh thu ka sawi a, thu an zawm ṭha hle. Goal khung lamah harsatna nei lo mah ila kan lama a luh ve zel chuan point hloh a awl a, chuvangin invem lam kan zir uluk. Tuna pawimawh ta ber chu kan ṭhat theih dan bera khelh chhuah theihreng hi a ni," tiin a sawi.

Inrinni inkhelah Man-chester United leh Chelsea lama hlawhchham striker Radamel Falcao chuan a club tan goal hmahruai a khung. Mifielder Thomas Lemar huan hun tawp dawnah goal hnih khung bawkin tun season-a a vawi li nan Monaco-in hnehna an chang a, league hmahruaitu an nih chhunzawm zel.