Vanduai a ni zozai tawh lo - Bilic

Season liam taa Premier League-a pasarihna West Ham-in Inrinni zan khan West Brom 4-2 in an hneh lo a, tun season-ah league match vawi li an chak lohna a ni.

Hammers hi 4-0 in an hnu fual hman a, match hnih a zawna goal li an chhuah tlinna niin tlarhnung a pawp tih phat rual a ni lo. West Ham manager Slaven Bilic chuan, "Harsatna kan nei a, kan siamṭhat a ṭul, keimah aṭanga ṭan a ngai a ni. Kei hi manager ka ni a, tuna kan buaina aṭanga tal chhuah hi ka mawhphurhna a ni," tiin a fihlim bik loh thu a sawi.

West Ham hi table-ah 17-naah awm mekin match nga lekah goal 13 an chhuah tawh. Kar liam ta khan Hammers hian Watford lakah 2-0 in hma hruai zet mah se 2-4 a lehthal an ni. Croatian manager Bilic chuan sawi chhunzawmin, "Mimal tihsual emaw kan vanduai emaw ti ringawt tur kan ni lo, season
ṭantirhah tihsual a tam mah mah a ni. Kan harsatna hi a liantham a, kan insiamṭhat vat loh chuan Premier League-ah chak hun kan nei ve dawn lo," tiin chhuanlam a siam lo.

Insiamṭhat ngei a tum thu sawiin Bilic chuan, "Tuna kan awm dan chiah hi kan hriat chian a ṭul a, kan ṭha tawk lo tih leh harsatna kan nei tih kan pawm a ṭul. A thim zawnga hmalam hun thlir anga lan erawh ka tum lo, kan result ṭhat tawk loh vanga mangan chi a ni lo. Awmze neiin thutlukna kan siam a ṭul a, player-ten an huaisenna an lantir a ṭul a ni," tiin a sawi.

West Ham hian nipui transfer-ah pound maktaduai 50 chuang player lak nan hmang mah se tun season hi 2010-11 season-a an relegate hnua Premier League bul an ṭan chhiat ber a ni.