City kal fawr zuitu Everton

Pep Guardiola-a kut thlak Manchester City an danglam tih a lang chho zel a, tun season-a match riat an khelhah an la chak vek. Inrinni zan khan Etihad Stadium-ah City-in mikhual Bournmouth 4-0 in an sawp a, Premier League-ah point 15 hmuin hmahruaitu an ni.

City an par vul avanga an phu anga fak hlawh lo Everton-in Ronald Koeman-a hnuaiah hneh loh an tawng lo. Toffees hian season ṭanna inkhela Tottenham an draw hnuah West Brom, Stoke City, Sunderland leh Middlesbrough te lakah point thum hlawh chhuakin tun season-ah hneh loh an la tawng lo. Everton hian Goodison Park-ah Boro 3-1 in an hneh a, Gareth Barry chuan Premier League-a vawi 600 a inlannaah goal a khung.

City an mawi

Manchester City-in Kevin de Bruyne (15'), Kelechi Iheanacho (25'), Raheem Sterling (48') leh Ilkay Gundogan (66') te goal hmangin Bournemouth an hneh. Minute 86-naah Nolito-a'n Cherries defender Adam Smith a tauh vangin hnawhchhuah a ni a, hei chiah hi Pep Guardiola tana chanchin lawmawm loh awmchhun a ni.

Liverpool aṭanga pound makta-duai 49-a City zawmtu Sterling-a'n nikum khan Cherries lakah hattrick a lo siam tawh a, amaherawhchu season liam ta khan English winger hian a man phu tawkin a khel lo. Pep Guardiola hnuaiah erawh Sterling hian a man a phu a, August thlaah player of the month niin Bournemouth an hneh ṭum pawhin player langsar a ni.

Kum 21-a upa Sterling hian goal a khung bakah Iheanacho khung tur a siam a, Cherries defender Charlie Daniels a bum hnuah player engemaw zat box chhungah a bum thei a, goal khat chiah khung mah se Pep-a hnuaiah harhtharna a chang zel.

De Bruyne a thiam

Manchester Derby-a hma taka goal khung thei Kevin de Bruyne-a'n Bournemouth an khelh ṭumin freekick aṭangin minute 15-na lekah goal hmahruai a khung. Hei chauh hi a ni lo, City-in goal hlauhawm an neih apiangin Belgian midfielder hi a inrawlh zel a, a tlan chakna leh ball thiamna hmangin khelmual chhungah ro a rel.

Sterling pawh a ṭhat tawh tehluh nen English winger ai hian De Bruyne a la ṭha zawk cheu. City boss Pep Guardiola pawhin De Bruyne chunga awm chu Lionel Messi chiah a awm thu a sawi. Spanish manager hian Messi bakah player lar Xavi, Andres Iniesta, Arjen Robben leh Thomas Muller te a enkawl tawh avangin De Bruyne tan fakna ri mawi a ni.

City boss Pep chuan, "Messi dawhkan kil pui thei tumah an awm lo a, phal a ni lo. Chutihrualin Messi ṭhutna bul chiah dawhkanah De Bruyne a ṭhu thei ang. Kevin hi player ṭha chungchuang a ni a, ball tel loin player thawkrim a ni a, ball tel chuan engkim a chiang. A hun takah thutlukna dik a siam ṭhin avangin kan team-a hetiang player kan nei hi kan vannei hle a ni. Player ṭha ber ni tur chuan nomawi chawi a ngai a, ka ngaihdan a dik lo a ni maithei mah se mimal chawimawina dawn chu a duh ngei ang," tiin fak phu De Bruyne a fak.

Engtin zel?

Manchester City hi a zawnin vawi riat an chak ta a, Premier League-ah vawi nga chak tawhin Europe inelnaah vawi thum an chak tawh bawk. Season bul an ṭan ṭhat ber ṭum niin kum 1897 a an record siam tawh chu an thai chhia.

Germany midfielder Ilkay Gundogan-a'n Premier League a khelh hmasak berah goal a khung nghal a, Nigerian striker Kelechi Iheanacho-a'n Premier League inelna hrim hrima vawi 14 goal zawna a petah goal 10 a khung tawh. Tlarhnungah wing back Aleksander Kolarov chu defence laiah Pep-a'n thiam takin a chhawr a, John Stone-a manto satliah a nih loh bakah Nicolas Otamendi a awm bawk avangin captain Vincent Kompany pawh dam tawh mah se Cherries an hmachhawn ṭumin bench-ah a ṭhu tluan - Belgian defender-in khelhna hmun chan a duh a nih chuan a sual chhuah ve a ṭul ang.

City hian hrem vangin Borussia Monchengladbach laka hattrick siamtu Sergio Aguero an chhawr thei lo tih hriat a ṭha a, chutichung chuan City boss a la indah sang duh lo. Pep Guardiola chuan, "Premier League hi khawvela league harsa ber a ni tih tun hma aṭangin ka hre tawh a, tunah a awlsam tihna a ni lo. September thla chauh a ni a, engmah tak tak kan la khel lo," tiin a inhrosa duh lo.

Manchester City ropui zan hian Arsenal aṭanga loan hmanga Bour-nemouth zawmtu Jack Wilshere erawh a cheṭha lo a, goal an chhuahna hmasa berah mawhphurtu a puh theih a ni a, Cherries tana inkhel bul a ṭan hmasak berah minute 68-naah lakhchhuah a ni.

Toffees a thlum

Everton-in Middlesbrough an mikhual ṭumin goal an chhuah hma a, an keeper Maarten Stekelenburg-a'n Boro striker Alvaro Negredo a tihbuai vangin minute 21-naah an lamah a tilut. Spanish striker Negredo hian Dutch keeper kut a tauh fuh avangin a foul niin a lang.

Goal an chhuah hnuah Everton an tho leh nghal a, minute thum hnuah Barry-a'n mualneitu tan goal khungin first half tawp hmain Seamus Coleman leh Romelu Lukaku ten an khung belh leh bawk.

English midfielder Barry hi Premier League-ah Frank Lampard (609) leh Ryan Giggs (632) te huangah inziak lutin vawi 600 khel thei player a ni ta a, kum 35-a upa a nih hnuah pawh player pawimawh a la ni.

Everton manager Ronald Koe-man chuan, "Point anga thlir chuan kan bul ṭan dan hi a lawmawm, a pawimawh ber erawh point kan hmuh dan hi a ni. Kan supporter-te chet danah engkim a chiang a, kan khelh danah an lawm. Kan team-te an huaisen a, amaherawhchu tun aia tam kan tlan a la ṭul a ni," tiin hmasawn zel an mamawh thu a sawi.

1978-79 season hnuah Everton-in an match hmasa panga aṭanga paliah hnehna an chang a, kum 37 kal ta khan First Division (Premier League awm hma) ah palinaah an awm. Everton boss Koeman hian season thara European competition khel thei tura an ṭhat tawk thu a sawi a, tuna an result neih mek nen Dutch manager thusawi hi thleng dik thei a ni.