Slimani-a'n goal hnihin bul a ṭan

Premier League champion Leicester City tan pound maktaduai 29 man striker Islam Slimani chun Inrinni zan khan a league match hmasa ber khelin goal hnih a khung nghal a - Foxes hi Burnley lakah 3-0 in hnehna a chanpui.

Leicester City player manto ber kum 28-a upa Slimani hian first half tawp hma chiahin Christian Fuchs freekick a tauh luh bakah second half-ah a lu hmang bawkin a goal hnihna a khung a, Burnley defender Ben Mee-a'n anmahni lama a tihluh chu Foxes chak nemnghehna goal a ni.

Algeria international Slimani hian a lu hmangin kum 2016 chhung hian league-ah goal kua a khung ta, a club hmasa Sporting Lisbon tan khan Portuguese Liga-ah vawi sarih a lo tauh lut hman tihna a ni. Foxes hian tlarhmaah Jamie Vardy leh Riyad Mahrez te an neih sa bawk avangin season bul ṭan ṭha lo mah se dahhniam theih an la ni lo.

Leicester City boss Claudio Ranieri chuan, "Champions League khelh zawha ka naute khelh dan kha ka hrechiang châk a, an khelh danah ka lawm hle. Goal thum kan khung a, chung zinga pahnih chu Slimani tauh luh a ni, hetiang hian a khelh chhunzawm ka duh a, min ṭantute pawh an hlim ngei ka beisei," tiin a sawi.