BVT-in hma an hruai zel

19th September, 2016

Zirtawpni zanah Bethlehem Vengthlang FC leh Ramhlun North FC te goal awm loin an inhnehtawk. Mizoram Premier League Season 5-ah Aizawl FC chiah 100% chak record nei an awm ta a, league hmahruaitu erawh vawi thum khelha point sarih hmu thei BVT an ni.

Chak kan phu - Tawia

First half-ah BVT-in goal khung theihna hun ṭha an nei lo a, Ramhlun North striker Vanlalthlamuana pet chu BVT defender-in an dang kawi chungin BVT keeper Malsawm-dawngzela'n a dang hman. Goal banin BVT a chhanhim a, Lalruatkima Dosel-in (Anggu-a) a per let chu kawh pawtin pet mah se Luangmual keeper hlui Mala hian a dang nawn.

Hun tawp hma hretin David Lalrinchhana hmangin Ramhlun North-in chakna goal khung theihna hun ṭha an nei a, BVT keeper Mala'n a hlauhawm tak tak hmain Zemabawk tlangval David-a cross a dang. Khawzawl tlangval Mala hi man of the match a thlan a ni.

Ramhlun North coach Lalruat-liana Sailo (Tawia) chuan, "Minute 70 chhung inkhel thununtu zawkah kan ṭang a, chak phu zawk kan niin ka hria. Chutihrualin hun tawp lamah chak kan duh luatah kan player-te an hmanhmawh a, tihsual kan ngah avangin a tawp kan khar danah erawh ka lungawi lo," tiin in-khel a hmuh dan Vanglaini palai a hrilh.

MPL kai thar hian an captain Lalramthlamuana chu inhliam vangin an chhawr thei lo a, tawnhriat la nei tlem zawk Lalmalsawma chu defence laia C. Ramdinmawia kawppui niin hun tawp lamah an talbuai deuh.

Chak phu an awm lo - BS-a

Bethlehem Vengthlang FC coach Lalbiaksanga Colney chuan, "Chak kan phu zawk tihte hi chu a ho ka ti, phu awm se chuan game-ah khan chak zawk an awm ang. Chak phu kan awm lo ve ve a ni," tiin anni aia an khingpui khelh ṭhatna a hmu lo.

Ṭantu nei ṭha BVT-in hun tawp lamah goal khung theihna tur ṭum thum vel an hlah a, Lalrammuanpuia pass PC Zosanga khawih fuh hman loh chu a teuh zual a ni. BVT boss BS-a chuan, "First half-a kan khelh dan kha chuan awmzia a nei lo. Amaherawhchu second half kha chu kan ta a niin ka hria, hun tawp lama kan ṭhelh zo zai te kha," tiin chak thei an nih thu a sawi ve bawk.

BVT leh Ramhlun North team enkawltuten team chhe zawkah an inngai lo ve ve a, chak loh la nei lo pahnih hi November 10-a an intawng dawn a, hemi hunah hian a ṭha zawk chinfelna neih a ni ang.

Hmabak

Ramhlun North hian September 23 hian I Day Football semifinal-a an hneh tawh Chanmari FC an hmachhawn dawn a, hemi hma ni hian BVT hmaah champion lai Aizawl FC an ding dawn bawk. Inkhel pahnihah hian goal luh lohna inkhel kan hmuh nawn a rinawm loh a, MPL boruak a nung chho zel.

Tute nge inlan?

Bethlehem VT (4-5-1) : Malsawmdawngzela; K. Lalmalsawma (Lalnghinglova 78'), PC Laldinpuia, H. Lalhlimpuia, Hmingthanmawia; R. Lalrinsanga, Lalmawizuala (Lalrammuanpuia 40'), Lalrintluanga (Lalrammawia 88'), Zosangkima, Laldingngheta; PC zosangliana.

Ramhlun North (4-4-2) : David Lalrinpuia; Israel Laldingngheta, C. Ramdinmawia, Lalmalsawma, Lalmuanawma; Jerry F. Zonunsanga, Lalruatkima Dosel, Zosangliana (Lalchhuanpuia 59'), David Lalrinchhana; Vanlalthlamuana, MC Malsawmzuala (Lalchhanchhuaha Fanai 69').

ZoFooty Statistics

Bethlehem VT 0 - 0 Ramhlun North

MoM : Malsawmdawngzela, BVT

51% Ball Posession 49%

14 Shot(s) 11

3 On Target 5

2 Yellow Card(s) 0

0 Red Card(s) 0

Mobile Showroom