Zanin hian a vawi 19 nan an intawng dawn Chanmari FC 6 - 11 Aizawl FC
Aizawl FC-in Durand Cup an khelh avangin Chanmari FC nen Mizoram Premier League Season 5 ṭan nia an inkhel tur chu zanin dar 7:00 hian inkhelh hun sawn a ni. Lammuala inkhel ngaihven hlawh tak en thei turin tualchhung football ngainatuten hun awl an insiam a ṭul ang.
Hman leh tun
MPL Season 2-a Chanmari FC an champion khan Aizawl FC hi panganaah an awm a, MPL hmasa berah pawh Chanmari hi pathumna an nih laiin AFC erawhin pangana an ni phak chauh.
K. Malsawmkima hnuaiah Aizawl FC-in harhtharna an chang a, nomawi chawi ngam lo tia an sawi ṭhin khan tualchhung football-ah rorelin champion loh an thiam tawh lo a ni ber.
Chanmari FC-in H. Vanlal-thlanga hnuaiah AFC hi MPL2-ah vawi hnih an hneh a, MPL3-ah Mala hote'n Thlanga hote an hneh a, second division I League-ah an lehpêl bawk. MPL hnu-hnung berah pawh AFC hi final telin vawi thum an chak.
Tun hnaiah Aizawl FC-in an pahnih inkarah result an neih ṭhat zawk avangin vawi 19 an inhmachhawn tawhah vawi 11 lai hnehna an chang a, Chanmari FC hi vawi ruk chakin tualchhung club lian pahnih hi vawi khat chiah an la inhnehtawk - Chanmari FC hian tun season an intawnna hmasa berah an chak thung.
Mala Vs Sanga
Chanmari FC coach Lalsang-zuala Hmar hian Bethlehem Vengthlang a enkawl laiin Mala enkawl Aizawl FC hi 2015 I Day Football final-ah a hmachhawn a, I League khel tura player hrawl ṭha ṭha lalut thei AFC an chak hram. BVT hian Sanga kaihhruaina hnuaiah Aizawl FC hi MFA Super Cup-ah an hneh thung a, hemi
ṭumah erawh MPL champion lai hi Spanish manager Manuel Retamero hnuaiah an khel thung.
Kumin I Day Football match hmasa berah Chanmari FC-in Aizawl FC an hneh nghal a, Sanga hnuaia khel Chanmari hi kawng engkimah an chungnung zawk. Amaherawhchu Mala hnuaia khel AFC insiamṭhain MFA Super Cup final-ah Chanmari FC an hneh let a, minute 19-na leka Zoramthara'n Aizawl FC tana goal a khung hnuah chak rinkai zawk Chanmari an tho tawh lo.
Mala leh Sanga-te kaihhruai club hi vawi thum an intawng tawh a, AFC coach Mala la chungnung hret mah se tun season bikah erawh an intluk tawk.
Tu nge ṭha zawk?
Goalkeeper : Aizawl FC-in MPL season nga chhunga best keeper ni vek thei Lalawmpuia an kawl a, MPL1-a Dinthar champion puitu keeper Zothanmawia an kawl bawk. Chanmari FC-in tun hnaia keeper hmasawn chak ber zinga mi Lalmuanawma bakah AFC keeper hlui pahnih MS Dawngliana leh Eddie Zorammawia te an kawl bawk.
Club pahnih hian keeper an nei ṭha ve ve a, zanin hian AwP-a leh Muanawma te an inlan thei dawn lo. Zanina inlan tura ngaih AFC keeper T. Mawia hian MPL5-ah goal a la chhuah lo a, match hnih khel tawh MS-a'n vawi khat chhuah tawh mah se a goal danah mawh a phur lo.
Defender : AFC hi MPL5-a player nei ṭha ber anga chhal an nih chuan an tlarhnung vang a ni ang. Delhi Dynamos zawm vangin Lalruatthara an chan tawh chung pawhin Lalramchullova kawppui turin Lalṭhakima an la nei thei a, left back Ricky Lallawmawma leh right back Lalrinzuala Khiangte te an la awm. AFC hian Chanmari FC duhlai Lalhriatrenga (Achia) an la chhuhsak thei bawk a, tlarhnung nei ṭha zawkah inhnialna tur a awm lo.
Chanmari FC lamin defence laia ding turin Mizoram captain Lalrinchhana Tochhawng, C. Lalrosanga, Lalmuanawma leh MS Dawngzela (Notea) te an kawl bakah mual sira awm turin Ramfangzaua leh Thomas Lalengkima te an kawl. Muanawma leh Notea te inhliam vangin an inlan thei dawn lo a, dam pawh nise khelhna hmun an chang kher lo thei bawk.
Midfielder : Chanmari FC-in R. Malsawmtluanga an lakluh avang leh AFC-in David Lalrinmuana leh Yuta Kinowaki an chan avangin Sanga hian midfielder a nei ṭha zawkah a ngaih theih.
Chutihrualin Mala chhawr theih turah H. Lalbiakthanga leh Rohmingthanga te an la awm avangin tualchhung football ngaihnatute ngaihdan a dang viau thei bawk ang.
Chanmari hian midfield laia khel thei turin Reuben Zosangpuia, Rochhingpuia leh Lalrinchhana te an la nei. Electric Veng tlangval Rinchhana hi Sanga game plan-ah chuan player pawimawh a ni.
Winger : Aizawl FC-in Albert Zohmingmawia leh Brandon VL Remdika te wing-ah an chhawr thei a, I League-ah tawnhriat an neih tawh bawk avangin Chanmari winger aiin an puitling zawk ang.
Chutihrualin Chanmari hian Mizo winger beiseiawm Lalmuanzova, Lalṭhasiama, Vanlalbiaa Chhangte bakah veteran winger Lalrammawia te an neih avangin an khelh ṭhat niah chuan AFC an tluk lohna tur a awm lo.
Forward : Chanmari FC-in MFA Super Cup best forward Malsawmfela an kawl a, a ṭha ber zinga chhiar theih Lalruatfela Zote an kawl a, MPL club zinga tualchhung striker nei ṭha ber an ni chiang.
AFC erawhin Chanmari el turin foreign striker Bright Middleton Mends an lalut thei. Ghanaian striker hi a tlangnel chho tawh viau nachungin William Lalnunfela, Vanlalduatsanga leh F. Lalremsanga ten hma an sawn leh deuh loh chuan Chanmari forward-te an thlanawm zawk.
Ngaihnawm tur lai?
Chanmari FC-in striker tlan chak Bright Mends an ven dan tur hi hriat a châkawm a, defender ṭha Lalrosanga hi Ghanaian striker veng thei ber tura ngaih a ni. Chutih-rualin Lunglei tlangval hian Mends-a ven a tumna lamah card hmuh loh a tum a pawimawh ang.
Aizawl FC lamin inkhel pawi-mawhah tawnhriat nei hlir player luhtir se Chanmariin an thiam chi game rang an khelh chuan MPL1 best midfielder Rohminga a talbuai thei tlat.
I Day Football leh MFA Super Cup thlirin Chanmari coach Sanga aiin AFC coach Mala'n player a la siksawi fuh zawk - trophy pahnih an kawl tawh. Champion ve ngei duh Chanmari an ṭang dawn a, zanin inkhel hi a nghahhlelhawm a ni.
Eng nge an sawi?
Aizawl FC assistant coach Lalruat-dika chuan, "MPL-ah chuan tumah ngaihnep theih an ni lo chungin Chanmari FC nena kan inkhel tur hi chu kan ngai pawimawh bik a, boruak pawh match dang ai chuan a sang zawk. Ka ngaihdan chuan Chanmari FC hi kan elpui ber a, chuvangin player kan luhtir dan thlengin kan fimkhur khawp ang," tiin inkhel pawimawh zia a sawi lang.
Chanmari FC manager Mawitea chuan, "Kan theih tawpin kan bei ang a, 100% chak record an neih hi kan tihtawp theih lohna tur a awm lo. Coach-in game plan ṭha tak a nei. Chak kan phu vangin I Day Football-ah Aizawl FC hi kan hneh tawh a, MFA Super Cup-a kan hneh loh chhan chu kan tihsual vang a ni," tiin a sawi.
Chanmari FC hian tualchhung football-a banner lian ber an nei a, MPL2 hun laiin an khuangpui hmangin thawm nei thiam bera ngaih an ni ṭhin bawk. Tun season-a a vawi khat nan Chanmari FC-in zanah an khel dawn a, manager Mawitea chuan, "Zan a nih tawh avangin ṭawiawmtu ṭha tak kan neih ka beisei a, Aizawl FC kan hmachhawn hunah hian Chanmari FC ṭantute zawng zawng Lammual pan turin kan sawm a ni," tiin mipui ṭawiawmna a ngai pawimawh hle.
Aizawl FC lam hi MPL ṭantirh anga ṭantu nei ṭha lo kha an ni tawh bik lo a, I League-a Mizo club khel hmasa ber hian inkhel pawimawhah ṭantu an nei chhe ngai lo.
Vawi 19 intawn tawhna chu
MIZORAM PREMIER LEAGUE
MPL1 Qualifier
Aizawl FC 2 - 1 Chanmari FC
MPL1
Aizawl FC 0 - 2 Chanmari FC
Chanmari FC 0 - 1 Aizawl FC
MPL2
Aizawl FC 0 - 2 Chanmari FC
Chanmari FC 2 - 1 Aizawl FC
MPL3
Chanmari FC 0 - 1 Aizawl FC
Aizawl FC 1 - 1 Chanmari FC
MPL3 FINAL
Aizawl FC 1 - 0 Chanmari FC
Chanmari FC 3 - 2 Aizawl FC
Penalty Shootout-ah Aizawl FC 4-2 in an chak
MPL4
Aizawl FC 3 - 2 Chanmari FC
Chanmari FC 0 - 1 Aizawl FC
MPL4 FINAL
Aizawl FC 3 - 0 Chanmari FC
I DAY FOOTBALL
2012 - Semifinal
Aizawl FC 2 - 1 Chanmari FC
2014 - Semifinal
Chanmari FC 1 - 2 Aizawl FC
2016 - Group Stage
Aizawl FC 1 - 2 Chanmari FC
MFA SUPER CUP
2016 - FINAL
Chanmari FC 0 - 1 Aizawl FC
I LEAGUE 2ND DIVISION - 2015
Aizawl FC 2 - 3 Chanmari FC
Aizawl FC 4 - 2 Chanmari FC