United - chak lo chak lo chak lo

Ni kaw chhung lekin Manchester United vawi thum an chak lo a, Pathianni tlaia an hneh loh chu season liam ta Premier League 13-na Watford an ni.

Vicarage Road-ah Watford tan Etienne Capoue, Juan Zuniga leh Troy Deeney te hmangin goal an khung a, United tana Marcus Rashford-a goal khung chu Jose Mourinho hote tan beiseina tluan tling lo siamtu mai a ni. An mualah Hornets 3-1 in an chak a, table-ah pakuanaah inhlang chhoin Red Devils erawh pasarihnaah an tla thla thung.

Pogba a bo?

Khawvel player manto ber Paul Pogba-a'n yard 25 vel
aṭangin crossbar a pet per a, theihna sang tak a nei tih lang mah se United goal nawr kawngah leh goal venhim kawngah a thawh hlawk tawk lo. A tawi zawng chuan French midfielder hi a man phu tawkin a la khel chhuak lo.

Juventus midfielder hlui hian vawi 63 a pass aṭangin vawi 47 chiah a pass dik a, ṭhiante tana chance siam sak a neih loh bakah a khingpuite ball chhuhsak a nei lo. Mourinho-a'n Pogba kawppui turin Marouane Fellaini a hmang a, Belgian midfielder kiangah khawvel player manto ber a langsar thei rih lo.

Portuguese manager-in Pogba a dah pawimawh a nih chuan player a siksawi ngam a ṭul dawn niin a lang a, captain Wayne Rooney hi a hlawh ni loin a khelh dan aṭanga a teh a ngai ang. Mourinho hian thutlukna dik a siam lo a nih chuan Radamel Falcao hnung zuiin amah tiamin Rooney leh Zlatan Ibrahimovic te nen United hi zuih ral nan an hmang lo ang tih a sawi theih loh.

Mourinho hian Porto a enkawl laiin vawi thum a zawnin an chak lo tawh a, tun ṭum hi February 2002 hnua Portuguese manager club enkawl a zawna vawi thum an chak loh lehna hmasa ber a ni. United tan Pep Guardiola enkawl Manchester City hneh loh kha a awm a nih pawhin Feyenoord leh Watford hneh loh zui chu mualphona a ni.

Chak phu Hornets

Italy-ah Walter Mazzarri leh Mourinho hi an intawng tawh a, manager inkar boruak hi a ṭha lo. Inter a enkawl laiin Mourinho hian, "Min hneh hi a career a hun tawn ropui ber," tiin Italian manager Mazzarri enkawl team an hneh loh ṭumin a lo sawi tawh bakah 'sabengtung anga thawkrim satliah' tiin Portuguese manager hi a lo ṭawng chhuak tawh bawk.

Hei vang hian Italian manager Mazzarri pawh substitute Zuniga-a'n a luh aṭanga a ball khawih hmasak bera hmahruaina goal a khung pawhin lawm namen loin a lawm niin a lang a, an goal thumna hi penalty hmanga Deeney khung a ni nachungin Watford hian chak an phu. Tun season Premier League-a vawi nga shot-a goal li khung thei Capoue-a'n goal a khung hnuah David de Gea ball thlauh chu Odion Ighalo-a'n goal ruakah a khung lo a, United-in awmze neia goal an nawr theih loh bawk avangin chak phu zawk an chakah a ngaih theih.

Mourinho a ngaihnawm

Thuthar thehdarhtu hmaa sawi tur tlachham ngai lo Jose Mourinho a la danglam lo a, inkhelh banah, "Kan team-in result ṭha nei turin thil pawimawh pathum kan mamawh a, pakhat chiah kan kutah a awm. Pakhatna chu mimal leh team angin kan tisual nasa a, hei hi kan insiamṭhat theihna tur a ni. Pahnihna chu referee thutlukna a ni a, hei chu kan thuneihna bak a ni. Pathumna chu vanneihna a ni a, hei pawh hi kan nei chuang lo. Team ṭha zawk ni chungin kan chak lo a ni," tiin referee chunga lungawi loh thu a sawi.

Watford-in goal hmahruai an khung theih nan Miguel Britos chu Anthony Martial lakah a foul ngei niin a lang a, referee-in Watford player a hrem loh avangin minute 34-naah goal hmasa ber a lut. Manchester United-in Rashford a hmangin sut mah se point an hlawhchhuah loh avangin an hmelma Manchester City chu point rukin an pha ta lo.