EFL Cup Leicester khelmuala inlan tur Chelsea
Zanin dar 12:15-ah EFL Cup third round khelh a ni dawn a, inkhel tur zingah Premier League champion Leicester City-in Liverpool laka chak lo hlim Chelsea an mikhual tur chu ngaihven hlawh ber zinga mi a ni.
Premier League club langsar zingah Merseyside club pahnih an inlan dawn a, Liverpool chuan Championship club Derby County chu khualmualah lenchilhin Everton-in Norwich City an mikhual thung ang.
Hull City sawp hlim Arsenal pawh an inlan dawn a, Gunners hian khualmualah an striker hlui Nicklas Bendtner-a khelhna Nottingham Forest an lenchilh dawn.
Conte tan hun ṭha
Leicester City-in Premier League-a Liverpool 4-1 ngawta an ngam loh hnuah an insiamṭha nghal a, Champions League-ah Club Brugge 3-0 ngawta an sawp hnuin league lamah Burnley chu 3-0 in an sawp chhunzawm a, an phur vanglai tak a ni.
Hetihrual hian Leicester tan tun ni 10 chhunga an match li khelhna tur a nih avangin season hmasa Premier League an champion ṭum pawha cup match ngaipawimawh vak lo Claudio Ranieri-a'n a player langsar a chawlh hahdamtir nual a nih pawhin a awm lo hran lo ang.
Chelsea-in Antonio Conte hnuaia an tlawm hmel hmasa ber hmuin Liverpool an ngam lo a, Italian manager chuan an match khelh leh turah a player te aṭanga hmasawnna hmuh a beisei thu a sawi. Premier League match an neih leh hmasak bera Emirates Stadium lenchilh tur Conte-a tan zanin hi insiamṭhatna remchang a ni.
Sakho inlan dawn?
Liverpool-in pre-season training an neih ṭumin Mamadou Sakho chu nungchang mawi loh vangin thawn haw a ni a, French defender hi a in fit leh hunah chauh a khelh tur thu manager Jurgen Klopp chuan a sawi. Sakho hian Derby hmachhawn turin training a nei leh tawh a, EFL Cup-a Burton Albion an hmachhawn ṭuma inhliam Emre Can chuan training a zawm leh tawh bawk. Klopp-a'n a player ṭhenkhat awltir a inkhel ngai lo zawk player a luhtir a nih pawhin a awm lo hran lo ang.
Leicester an sawp hnu lawka Chelsea hnehtu Liverpool hi Championship club lakah chak tura beisei ni mah se Klopp-a'n, "Dinhmun ṭha zawk nia kan hriat apiangin hnehna an chan zel chuan khawvel hi hmun hrehawm tak a ni ang. Mi zawng zawng hi hun ṭha pek kan ni a, a bei thiam leh hun neih chhawr thiam apiang an dingchang ṭhin," tiin a sawi a, zaninah a thusawi dikna hi chak lo tura ngaih Derby-in an lantir lo ang tih a sawi theih loh.
Everton hmaah Norwich
Manager thar Ronald Koeman kaihhruaina hnuaiah Everton an vul mek a, Merseyside club hian Premier League match nga an khelh tawhah tlawm hmel an la hmu miah lo - EFL Cup-ah league lama an kaltluang lai hi chhawm nun an duh khawpin a rinawm.
Dutch manager Koeman-a'n Middlesbrough 3-1 a an hneh hnu lawkah a naute khelh danah a la lawm tawk loh thu a sawi a, an goal nawr a la na tawk loah a ngai. Zanina Championship club Norwich an mikhual hunah attacking game hmuhnawm zawk pholan ngei an tum ang.
Arsenal hmachhawn
tur Bendtner
Khawvela striker thiam pawl ni hauh si loa hming langsar pawl ni phak chu Nicklas Bendtner-a ni. Arsenal striker hlui hian Championship club Nottingham Forest chu nipui transfer lai khan zawmin amah siam liantu club a hmachhawn tur hi hmuh a chakawm hle.
Arsenal hi Hull City laka 4-1 a chak hlim an ni a, kar hmasa lawkah Champions League an khelh chauh bakah an league match khelh leh tur hmasa berah Chelsea an hmachhawn dawn bawk avangin Arsene Wenger-a'n a chhawr rim loh zawk player a khelhtir nualin a rinawm.
Zanin Inkhel Tur
Nottingham Forest 12:15 Arsenal
Leeds United 12:15 Blackburn Rovers
AFC Bournemouth 12:15 Preston North End
Everton 12:15 Norwich City
Derby County 12:15 Liverpool
Brighton & Hov… 12:15 Reading
Newcastle United 12:15 Wolverhampton
Leicester City 12:15 Chelsea