Formula 1 hmahruaitu Rosberg

Pathianni zan khan Singa-pore Grand Prix tlan niin Nico Rosberg-a'n hnehna a chang. Ger-man driver hian world championship-ah Lewis Hamilton lehpelin hmahruaitu a ni leh ta.

Singapore-a intlan-siakah hian Mercedes driver Rosberg hian lap 61 hi darkat khet leh 55m 48.950s chhungin a tlan thleng a, a hnungah hian Red Bull driver Daniel Ricciardo thlengin pathumna chu Britain driver Lewis Hamilton a ni. World champion vawi li ni tawh Sebastian Vettel-a'n a hnung ber aṭangin bulṭan mah se pangana dinhmun a luah phak a - Force India driver Sergio Perez chu pariatna a ni bawk.

Kum 31-a upa Rosberg hian season tirlam intlansiak paliah a zawnin hnehna a chang vek a, hemi hnu hian Hamilton rawn cheṭha chho vein Britain driver hian vawi ruk zet hnehna a rawn chang ve leh. Champion nomawi kawltu Hamilton hian point 19 zeta a san fal hman avangin a nomawi a humhim ngei dawn niin a lang hman.

Mahse, rin angin thil a kal ngawt bik lo. Tun hnai intlansiak hnuhnung pathumah Rosberg hian pakhatna dinhmun a luah vek a, point 273 hmuin a teammate Hamilton hian point 265 a hmu thung. Kuminah intlansiak hmabak paruk chiah a awm tawh a, October 2 khian Malaysian Grand Prix an tlan leh ang.

Rosberg chuan, "Kartawp nuam leh hlimawm tak ka hmang a, chutih rual erawh chuan ka hmabak hi a la hautak dawn hle. Ka elpui hi Lewis a nih miau avangin chetsual zeuh pawh a thiang lo," tiin a sawi. Rosberg hi Formula1 Grand Prix 200-ah tlan tawhin ṭum 22 hnehna a chang tawh a, he infiamna huangah hian ani aia hnehna chang tam chu driver 12 chiah an awm.