Tottenham ngamtu an la awm lo

Pathianni zan khan Tottenham Hotspur chuan 1-0 in Sunderland an hneh a, Premier League khelh mekah match nga khel tawhin Mauricio Pochettino-a naute hian ngamtu an la tawng lo.

Inkhel ṭantirh aṭangin Spurs-in inkhel thunun nghal mah se goal an khung thei lawk lo a, vawi 22 zet Black Cats goal-a an pet hnuah Harry Kane hmangin minute 59-naah an goal neihchhun hi an khung ve chauh. English striker goal khungna turin Sunderland defender Papy Djilobodji a chesual a, Dele Alli-a ball tauh a pet chhuah hman loh chu Kane hian Premier League match 91-a khelh tawhah a goal 51-na ni turin a khung a ni.

Sunderland manager David Moyes-a'n Black Cats a enkawl ṭan--tirhin fan-te chu relegation battle hmachhawn tura inpeih turin a chah lawk a, a thusawi dikna a thleng zel - Sunderland hian league match nga an khelh tawhah hneh an la tawng lo.

Spurs tan transfer tawp nia pound maktaduai 30-a Newcastle United aṭanga an lakluh Moussa Sissoko chuan a match hmasa ber a khel a, midfield-a Mousa Dembele leh Victor Wanyama te nena an inkawp chu Premier League nomawi beisei ngam tur khawpin an ṭha tawk.

Mualneitu Spurs hian inkhel pumpuiah 73.8% lai ball changin vawi 31 zet shot an nei a, Kane, Son Heung-min leh Toby Alderweireld te chuan vawi tam chance ṭha an hloh. South Korean forward Son a khel ṭha takzet a, shot vawi sarih zet neiin key pass vawi nga lai a nei thei.

Sunderland tana player langsar ber chu Jordan Pickford a ni a, kum 22-a upa goalkeeper hian vawi tam Black Cats a chhanhim. Manchester United aṭanga loan-a Sunderland zawmtu Adnan Januzaj erawh minute 90-naah yellow card vawi hnihna a chawi avangin hnawhchhuah a ni thung.