Barca record nihrualtu Real an chak

Real Madrid chuan an mi-khualna ramah Espanyol chu James Rodriguez leh Karim Benzema goal khung hmanga 2-0 a hnehin La Liga-ah match 16 chhung chu a zawnin an chak ta a, Zinedine Zidane-a naute hian 2010-11 season-a Pep Guardiola hoa Barcelona-in La Liga-a chak zawn rei record an lo siam tawh chu an nihrual.

Gareth Bale leh Cristiano Ronaldo tel loa khel Real Madrid hian league match li an khelh tawhah vawi li hnehna changin table chung berah an awm a, an hnuai chiahah hian vawi li inkhela vawi khat chak loh nei tawh Barcelona an awm thung.

Inkhel chu

Real Madrid tan Champ-ions League-a Sporting Lisbon 2-1 an hneh ṭuma inhliam Gareth Bale a inlan thei lo a, Portuguese forward Ronaldo chu dam lohna avangin hahchawlhtir a ni bawk.

Mahse, Real-in an player chhuanvawr pahnih tel lo pawhin khualmualah harsatna an tawk lo. First half tawp nan minute tlemte chiah a awm tawh tihin Colombia forward Rodriguez chuan Real goal hmahruai a khung a, Santiago Bernabeu-ah a tan hmun a awm tih a nemnghet.

Nipui transfer laia chhuak tur anga sawi Rodri-guez hian yard 30 vel aṭanga Toni Kroos ball pek a dawn hnuah an khingpui player pahnih a bum a, Espanyol goal-ah Diego Lopez-a dan phak lohin a kil sirah a thlawh lut.

Minute 71-naah Ben-zema a inlar ve leh a, khelmual pawn lama a boruak duhawm lo avanga France tana la koh leh loh striker hian ram tana khel tlak a nihzia pholang nawnin Lucas Vazquez-a cross chu awlsam takin a khung.

James faktu Zidane

Real Madrid manager Zine-dine Zidane chuan, "Player talent nei ṭha tak James Rodriguez leh Karim Benzema kan nei a, anni ang player hi chuan engtiklai pawhin danglamna an thlen thei a, kan tana pawimawh ber erawh he team tana an theihna an hmang ṭhin hi a ni," tiin player pahnih chuan mahni hmasial lo taka team tana an theihtawp an chhuah ṭhin thu a sawi.

Transfer bazar-a Real Ma-drid player thawm nei lian ber chu James Rodriguez a ni a, Colombian forward hi nipui lai khan Real chuan a duhna lam a pan theih tur thu an hrilh niin Spanish chanchinbu lar Marca chuan a tarlang hial.

Mahse, Zidane chuan a player hi fakin,"A goal khung kha ama thawhrah liau liau a ni a, ka lawmpui takzet a ni. Goal a khung a ni satliah lo a, team tan a thawhhlawk takzet. Karim-a hnungah number 10 angin ka chhawr a, ka beisei ang ngeiin a khel chhuak a ni," tiin a player hi Santiago Bernabeu-ah chelh a tum hmel hle.

Real Madrid midfielder Ca-semiro chu first half-ah hliam vanga lakchhuah a ni a, French manager chuan kum 24-a upa Casemiro din-hmun hi chiang taka hriat theih a la nih loh thu a sawi.