India leh Saudi Arabia inhnehtawk

AFC U-16 Championship neih mekah Pathianni zan khan India leh Saudi Arabia chu 3-3 in an inhnehtawk a, inelna thlengtu India-in quarterfinal lut turin beiseina an la neih chhunzawm ve zel.

Inkhel ṭantirh aṭangin India an chungnung nghal a, minute lina lekah Aniket Jadhav chuan mualneitu team tan goal hmahruai a khung nghal. Saudi Arabia rawltharte an insiamṭhat hmain India bawk an langsar chhunzawm a, Aman Chhetri chuan minute 22-naah India goal hnihna a khung.

Goal hnih an chhuah hnuah Saudi Arabia an harh zawk a, minute 34-naah Abdulazia Sulaiman chuan goal khat khung vein first half tawp hmain penalty an hlawh chhuak bawk. Mahse, India-in UAE an hmachhawn
ṭuma penalty dang tawhtu goalkeeper Dheeraj Singh an nei a, Saudi tana Mali penalty pet chu a dang ṭha leh hle.

Awlsam takin India an chak tawh mai dawna a lan hnuah Saudi tan Feras Tariq chuan minute 82 leh 83-naah a zawn zatin goal a khung a, India an hawihai hle. Injury time a ni tawh a, an match hmasa ang bawkin goal khung hmasatu India an tlawm leh dawn niin a lang.

Mahse, Mizo rawlthar Laleng-mawia (Apuia) a inlar a, substitute bench aṭanga tlan lut Vaivakawn rawlthar hian India tan penalty a hlawh chhuak. Captain Suresh Singh rawn pen chhuakin cool takin a khung a, team pahnihin lungawi taka point an insem a ṭul ta a ni.

India hian Nilaini zan dar 7:00-ah Iran an hmachhawn leh dawn a, Star Sports 2-ah live-in en theih a ni ang.