Juventus hnehtu Inter Milan
Season nga chhung Italy-a hnehsawh taka roreltu Juventus chu Pathianni zan khan San Siro Stadium-ah Inter Milan chuan Mauro Icardi leh Ivan Perisic te goal hmangin 2-1 in an hneh.
Nikum October 28 khan Juventus hi Sassuolo lakah 1-0 in an lo tlawm tawh a, hemi hnuah tun
ṭum hi league match bika an chak loh lehna hmasa ber a ni. Tun season league match li khelh tawh aṭang-
in Juve hian point kua hmuin table-ah pahnihna an ni a, chak loh la nei lo Napoli (10 points) chu hmahruaitu an ni ta.
De Boer-a hun
Inter Milan-in Roberto Mancini banin beiseina sang tak nen Frank de Boer an lalut a, beisei anga season bul an ṭan loh avangin Dutch manager hi a dinhmun a derthawng hman hial! Kar-tawp league match result hian a boruak rit zualpui a paih kian sak ngei ang.
'Thau' tia sawisel Gonzalo Higuain chu bench-ah ṭhut tir a ni a, league match thum
aṭanga goal thum khung thei striker tel loin Juve hian goal an nei hmasa tho a, a khungtu erawh defender Lichtsteiner niin minute 66-naah 1-0 in hma an hruai.
Europa League-a chak lo hlim Inter an talbuai chhunzawm dawna a lan laiin goal an phurh aṭanga minute hnih hnu lekah Icardi chuan corner aṭanga ball lokal a tauh lut a, minute 78-naah Perisic chuan an goal hnihna a khung bawk. Sereia A top scorer Higuain hi minute 74-naah tlan luhtir ni mah se danglamna a thlen tawh lo a, hun tawp ruala Inter midfielder Ever Banega hnawhchhuah a nihin result a ti danglam phak tawh lo bawk.
Inter Milan hian tun season Serie A match liah goal nga an khung tawh a, heng zinga goal li hi Argentina international Icardi khung a ni. Kum 23-a upa Icardi hian a club hi point sarih hmuh pui tawhin table-ah parukna a nih pui mek.
Manager te thukhawchang
Inter coach Frank de Boer chuan, "Player ten ka duhdan an hre tawh a, chumi anga khel chhuak thei tur chuan kan zir ngun hle. Vawiin khan a takin kan lantir ta a, goal kan chhuah hnuah pawh inkhel thununtu kan la nih chhunzawm thei," tiin a ruahman anga an khelh chhuah theih thu a sawi.
Ajax boss hlui chuan sawi chhunzawmin, "Juventus hi team ṭha leh khauh an ni a, anni laka ka team te goal khungtir kha a nuamin hnehna chang tura ka naute thawhrimna khan min ti lawm. A bik takin Icardi kha a khel ṭha lehpek hle a, ani hi chuan hamrik hnuhnung ber a rik thlengin club tan a tha tawp a hmang ṭhin," tiin a sawi.
Juve coach Massimiliano Allegri chuan, "Goal kan neih sa minute hnih chhung chauh pawh kan venghim thei lo kha kan inenfiah a ṭul hle. Team pumpui kan khelh chhiat miau avangin tlarhma lam tan goal khung a harsa a, mimal dem tur a ni lo. He result hian chesual thei kan nihzia min hriat nawn tir leh a, a aia ṭha zawkin kan kir leh ang," tiin season hmasa angin an chak lohna chu insiam ṭhat nan hman ngei a tum thu a sawi.