Spurs chakna Harry Kane

Pochettino rilru a dam

Tottenham boss Mauricio Pochettino chuan, "Goal khung ngei tumin nasa takin kan bei a, point thum kan hlawh chhuak thei hi ka hlim takzet a ni. Champions League-a Monaco hneh lo hlim kan ni a, zanin kan result hian ka rilru na pawh a thawi dam a ni," tiin Black Cats an hnehna chu a hlutzia a sawi.

Argentine manager chuan sawi chhunzawmin, "Ka duh ber chu chance tam tak insiam a, ṭha taka khelh a ni - a chang chuan goal khat lek pawh khung turin theihtawp tak meuh meuh kan chhuah a ngaih chang a awm ṭhin a ni," tiin goal an khung lawk loh chungchang a sawifiah.

Sunderland manager David Moyes chuan, "Vawi tam kan dan hnuah hotein goal kan chhuah leh si. Hma kan sawn dawn tih ka chiang a, ka hmaah hian hna hautak zet a inchhawp mek a ni. Training naah rim lehzualin kan bei dawn a, chu chu ka nuam tihzawng tak a ni," tiin hmasawn an tum tur thu a sawi.

Kane-a inhliam

Tottenham tana goal khungtu Harry Kane chu minute 87-naah ngalrek hliam avangin lak chhuah a ni a, kum 23-a upa striker hliam hi eng ang chiaha na nge a nih he chanchin buatsaih a nih lai thleng hi chuan hriat a la ni lo. Kane bakah hian midfielder Mousa Dembele leh dender Eric Dier chu hliam vang thoin lakchhuah an ni.