Stoke sawptu Palace

Crystal Palace-in an mikhual Stoke City lakah ṭhat an chhuah duh lo a, Mark Hughes-a naute hi 4-1 tehmeuhin an lo sawp. Stoke-in England tana friendly match a khelhna lama inhliam Jack Butland an mamawh zia a lang nawn a, March thlaa England international inhliam hnuah hian league match-ah goal chhuah loh an la nei miah lo.

Selhurst Park-a inkhelah mualneitu team tan defender pahnih James Tomkins leh Scott Dann te chuan inkhel ṭan aṭanga minute 11 chhung lekin set piece aṭangin goal hnih an khung der tawh a, minute 70 hnu lamah James McArthur leh Andros Townsend te chuan goal khat ve ve an khung ve leh bawk.

Injury time minute 90+4 naah Marko Arnautovic chuan Stoke City tan goal khat khung ve mah se hun a tawp zui mai avangin an mualpho lutuk tur khuhna mai a ni. Potters-in tlarhmaah Wilfried Bony, Arnautovic, tawnhriat ngah Jonathan Walters leh Bojan Krkic te nei mah se goal hmaah an hlauhawm tawk lo.

Stoke goal chhuahte hi goal ṭha tak an nih vek avangin Potters veteran keeper Shay Given-a tan tih theih a tlem a, hetihrual hian kum 40-a upa keeper hian Premier League match a khelh hnuhnung vawi 10-ah goal 26 zet a chhuahna a ni ta.

Crystal Palace manager Alan Pardew chuan, "Kan khel ṭha takzet a, team
ṭha tak kan nihzia vawiinah khan kan pholang a ni," tiin team ṭha zawkin hnehna an chan thu a sawi.