Saints an chak ve ta

Southampton-in manager thar Claude Puel an neih hnuah Premier League-a an chak hmel hmasa ber an hmu ve ta a, Pa-thianni zan khan an mikhual Swansea City chu 1-0 in an hneh.

St Mary's-a inkhelah mual-neitu team tan Nathan Redmond chuan pen 12 vel leka hla aṭangin a pet goal lo a, striker Charlie Austin chuan crossbar pet perin Saints an vanduai dawn niin a lang hman.

Mahse, minute 64-naah substitute Austin a vanduai tawh lo. Kum 27-a upa striker hian a match hnuhnung pahniha a goal thumna turin Swansea goal-ah a khung a, 1-0 in a team hi hnehna a chanpui ta a ni.

Southampton manager Claude Puel chuan, "Game har-sa tak a ni a, ka nauten theih-tawp chhuaha an beih avangin hnehna kan chang a, ka lawmpui a ni. Chance tam kan neih hnuah goal khung dan kan hria a, hei hi kan hmabak zel atan a pawimawh a ni," tiin a naute khelh danah a lawm hle.

Swansea boss Francesco Guidolin chuan, "Saints khan hnehna chan an phu a ni. Kan khel ṭha lo takzet a, kan rilru puthmang kan thlak a ngai. Tun aia huaisen zawka kan khelh a ngai a, kan rilru huaisen loh vanga chak zo lo kan ni," tiin a naute khelh danah a lawm loh thu a sawi.