Champion lai hnehtu Argentina

Ram leh ram mipa tennis team hmanga inelna Davis Cup 2016 semifinal-ah champion lai Great Britain chu Argentina lakah 3-2 in an chak lo. Inkhel dangah Croatia chuan France 3-2 in an hneh ve bawk - November 25-27 chhung khian final khelh tur a ni ang.

Britain hian nikum khan Andy Murray a hoin kum 79 leh thla sawm hnua a vawi khat nan Davis Cup nomawi an chawi a, kuminah erawh an ropuina an humhim thei lo.

Glasgow-a inkhelah singles match hmasaah world number 2 Murray chu Juan Martin del Potro lakah 6-4, 5-7, 6-7, 6-3, 6-4 in a chak lo nghal. Britain tlangval Kyle Edmund chu Guido Pella lakah a chak lo nghal bawk.

Doubles-ah Murray te unau chuan Juan Martin del Potro leh Leonardo Mayer te ṭangdun hnehin an ram beiseina an chhawm nung. Pathianni khan singles match hnih khelh niin a hmasa zawkah Murray-a'n Guido Pella a hneh a, ram pahnihte dinhmun chu 2-2 chiah a ni.

Singles match hnuhnung berah Argentina tlangval world number 114 Leonardo Mayer chuan vawi 15 ace siamin Dan Evans chu 4-6, 6-3, 6-2, 6-4 in a hneh. Argentina hian tun hnai kum 15 chhunga a vawi 11 nan semi-final an khel a, hun pawimawhah an tawnhriat ngah an chhawr ṭangkai a ni.