Zanin dar 7:00-ah Aizawl FC Vs Gokulam
I League-ah Aizawl FC-in zanin dar 7:00 hian Gokulam Kerala an mikhual dawn. Mizo club hi relegate thei dinhmunah an ding a, Mizoramin I League club an neih zel theih nan Mizo mipui tan Aizawl FC thlawp hi a pawimawh hle. Inkhel en man hi Rs 100 man chauh a ni a, football ngainatute tan RG Stadium, Mualpui pan hun a ni.
Thutlukna an la nghak
Aizawl FC-in an match hnuhnung berah Churchill Brothers chu 1-1 in an inhnehtawkpui a, Goan club hian foreigner hman theih zat aia tam an khelhtir avangin Mizo club-in point thum an beisei.
Aizawl FC sporting director Hmingthansanga chuan, "I League danah chuan playing XI-ah foreigner pali a hman theih a, foreigner hnawhchhuah an awm a nih chuan foreigner hman theih zat pawh tlahniam ve nghal tur a ni. Hei bakah hian point dangah dan bawhchhia an awm a nih chuan 3-0 a chak loh tir tur a ni, tih dan a awm. AIFF hnenah lehkha ziakin kan zualko tawh a, thutlukna kan nghak mek," tiin Vanglaini a hrilh.
Churchill hian foreigner pali an hmang a, defender Jose Luis Moreno an hnawhchhuah hnuah Ivorian defender Aubin Kouakou dah lutin Indian player Kingsley Fernandes an la chhuak. Player 10-a an khel chungin foreigner pali an hman chhunawm a, Mizo club chuan an khingpuite hian dan an bawhchhe ngeiah an ngai.
Nikum khan Real Kashmir chuan Churchill Brothers an hmachhawn ṭumin foreigner hman theih zat aia tam an hmang tawh a, 1-0 in chak mah se point thum paihsak niin Goan club hi point thum pek an ni thung. AIFF kutah Mizo club hmalam hun a innghat.
An kutah la awm
AIFF thlawpna an dawng a nih chuan Mizo club-in point hnih an hmuh belh dawn a, I League khel zel tur chuan khelmualah point an sualchhuah a ṭul tho tho. Aizawl FC-in thlasik bazar an hmang ṭangkai a, an player thar Zothanpuia (Thangpuia) leh Luis Rodriguez te an rintlak hle. Colombian defender Luis hian Goan club lakah si phurh sutna goal a khung a, goal venhim chauh ni loin goal khung kawngah pawh a pawimawh.
Gokulam Kerala an hmachhawn hunah hrem vangin MPL11 best player Lalthankhuma (TK-a) an chhawr thei dawn lo a, midfield an siksawi a ṭul phah dawn. Colombian defender Luis hi defensive midfield-a an chhawr a nih pawhin thil mak a ni lo ang.
Gokulam an hmachhawn ṭumin tlarhmaa an chhawr ṭhan Lalbiakdika leh Augustine Lalrochana te bench-ah an dah a, an pahniha bul an ṭan nghal lo a nih pawhin pakhat zawk tal chu bul ṭan leh tura ngaih a ni.
Kerala club lam hi
Gokulam Kerala hian an match hnuhnung berah Aizawl FC elpui Delhi FC chu 6-3 in an sawp a, hemi hma match thumah erawh Kerala club hi an chak lo vek.
Season ṭantirha champion rinkai ni pha Gokulam tan nomawi beiseina chhi nung tur chuan Aizawl FC lakah point thum hmuh chhuah ngei ngei a ṭul a, hei tak hi Mizo club tan a harsat phah ang.
Chutihrualin nikum December thlaa EMS Stadium, Kozhikode-a an inkhelh ṭumin Mizo hlanga khel Aizawl FC-in Gokulam lakah point khat an hlawh chhuak a, goal an khung hmasa bawk. Kerala club tan attacking football khelh ngei a ṭul a, Mizo club tan pawh mahni muala khel tur an nih avangin point thum beisei ngam a ṭul. RG Stadium-ah goal hmuh tur a awm ngei a beisei theih ang.