Indian Wells khel tur Djokovic

Novak Djokovic chuan Indian Wells a khel dawn tih a chiang ta - ATP 1000-level tournament a khelh tur thu hi inelna buatsaihtu lam chuan social media kaltlangin an puang.

Grand Slam vawi 24 champion tawh Djokovic hian kuminah nomawi a la chawi lo, tennis a khelh hun chhunga title 100-na tur a nghak mek, hliamin a tihbuai fo avangin a nghak rei ve ta hle a ni.

Indian Wells chuan thuchhuah siamin, "Thlalerah inkhel turin Legend a lo kir leh dawn ta," tiin X (Twitter) ah an tarlang a, vawi nga a champion tawhna hmunah Djokovic a kir dawn tih an nemnghet.

Serbian star hi a champion thei a nih chuan mi bik pathum zingah a tel dawn, tun hmain Jimmy Connors (109) leh Roger Federer (103) te chuan nomawi 100 an lo chawi tling tawh, an huanga awm turin vawi khat champion a la mamawh.

Djokovic a inlan dawn lai hian, duhsak taka wildcard an pek Venus Williams erawh a inlan dawn lo - American star hian season hmasa pawh khan tournament pahnih chauh a khel, inkhelh la chawlhsan lo mah se a inlan tlem thei ta hle.

Indian Wells hi March 2016 chhungin California chhim lamah khelh tur a ni ang.