Chelsea tan insiam ṭhatna hun

Zanin dar 1:45 hian Chelsea chuan Southampton an lo mikhual dawn - Enzo Maresca leh a naute tan Premier League mawngphah lauhtu tum hi insiamṭhat theihna remchang ṭha a ni ang.

Blues hian tun hnaiah beisei an phak lo hle. EPL leh FC Cup-ah a zawnin Brighton an hneh lo, kar tawp inkhelah Aston Villa tlawhin 2-0 a chak lo chungin Villa Park an chhuahsan leh bawk.

London club hian player ṭha an nei a, mahse season tir lama an inkhel hmuhnawm leh hlauhawm tak ang kha hmuh tur a awm thei rih lo, tun hnai khan Cole Palmer chuan ama thiam loh a nih thu a sawi hial.

Villa an hneh loh ṭum hian Enzo Fernandez hmangin goal khung hmasa mah se an venghim thei lo, a tawpah an tuar ta a ni; Saints lakah an tlarhnung lam an fimkhur zual a ngai ngei ang.

Argentina international Fernandez hian zaninah pawh hmun pawimawh tak a luah leh dawn a, mual sir lama awm Palmer nen an inkawp rem a pawimawh ang, tun hnaiah Palmer hian goal khung a harsat.

England international Palmer hi Chelsea chhiat lai taka khaidingtu kha a ni a, tun hnaia khel ṭha tawk lo mah se a theihna sawi nep theih a la ni lo, league goal 61 chhuah tawh Southampton tan buaipui tham a ni ang.

Saints hian EPL match 26 aṭangin point kua chauh an la hmu, chhiarkawp danin la him thei mah se season thara English football inelna sang ber an khelh zel theihna tur chuan thil mak a thlen a ngai tawh.

Maresca enkawl Blues hian team beidawng Saints an hmachhawn a nih chuan nuamsa takin an chak thei ang a, tlak hlaua bei ngam Saints an hmachhawn a nih erawh chuan a harsa ve hle thei bawk.

Inkhel dangah Aston Villa chuan zan dar 1:00 hian Crystal Palace an lenchilh dawn - Unai Emery naute hi Liverpool point chhuhsak thei an ni, chumi hnuah Chelsea an hneh leh bawk, sawi nep theih an ni lo.