Point 13 zetin PSG an sang fal ta

Paris Saint-Germain chuan an mikhualna ramah Lyon chu 3-2 in an hneh. Paris club hian Ligue 1 nomawi an kawl lai an humhim leh ngei a rinawm, anmahni hnaih bertu Marseille lakah point 13 ngawtin hma an hruai fal ta a ni.

Pathianni zan Groupama Stadium-a inkhelah goal kan hmu har a, goal panga hi second half chhunga lut vek a ni. PSG tan defender Achraf Hakimi chuan goal hnih a khung a, tunlaia khel ṭha thei tak Ousmane Dembele chun goal khat a khung bawk.

Mualneitu Lyon goal pahnih hi Rayan Cherki leh Corentin Tolisso te khung niin, minute 80 hnu lama an khung ve ve a nih avangin hun a tepter tawh a, goal dang khunga sut zo turin hun an nei hman tawh lo.

PSG manager Luis Enrique chuan, "Inkhel hriatthiam har leh mak tak chu a ni, goal khung kan harsat loh ang bawkin a chhuah pawh kan awlsam emawni tih mai tur a ni.

"Match tin mai hi kan tan chuan hmasawnna hun ṭha a ni a, eng ang taka ṭha nge kan nih chu fiahna a ni zel bawk," tiin a sawi a, league nomawi erawh sawi nan a la hma lutuk tih a sawi bawk.

PSG hian French Cup an khel leh phawt dawn a, Liverpool nen Champions League last 16 an khelh hmain Lille nen Ligue 1 match khelh tur an la nei bawk a ni.