Luka Modric a la tar lo

Kum 39 mi ni tawh mah se, Luka Modric a la tar lo - Croatian midfielder hian Pathianni zan khan goal mawi bik a khung a, Real Madrid chu Girona lakah 2-0 in a chakpui.

Madrid tan Modric bakah Vinícius Júnior chuan goal khat a khung bawk a, Girona-in a chhanletna tur an neih loh avangin Real Madrid-in hnehna an chang.

Real hian table-ah pahnihna dinhmun an luah lehnghal a, hmahruaitu Barcelona nen an point hmuh zat a inang - head-to-head a dinhmun ṭha zawk Catalan club-in table chung ber an luah.

A hming Modric

Kum 39 mi a ni tawh a, a kum ang zat footballer tam zawk chu an chawl tawh a, a la chawl lote pawhin sum umin, league lar lo zawkah hahdam takin inelna an hmachhawn tawh - Modric erawh Real captain a la ni!

Mahse, Modric hi Real tan bul ṭan regular erawh a ni tawh bik lo a, Pathianni zanah pawh Osasuna laka red card hmutu Jude Bellingham a inlan theih loh avangin bul a ṭan ve chauh - goal a khung zui.

Modric hian minute 41-naah corner aṭanga ball kal, tauh chhuah chu a awmin a la thla a, leiah ball hi sawt leh zauhin, a kang lai tak chu chiang mangkhengin goal-ah a thlawh lut - tun season-a goal li a khungna chiah a ni.

A tawp nan Vinicius

Modric-a goal khung hmain Girona hian chance duhawm an nei a, mahse, Manchester United midfielder hlui Donny van de Beek shot ṭha tak chu Real keeper Thibaut Courtois chuan a hming chher nan a lo hmansak.

Real tana Lucas Vazquez chance hlah pawh uiawm a tling a, Girona tan Arnaut Danjuma chuan si phurh sutna remchang nei mah se, uiawm takin a hlah bawk - Real-in minute 83-naah an hrem zui.

Kylian Mbappe-a'n goalkeeper Paulo Gazzaniga a paltlang theih loh hnuah hun ṭha nei lehin, Vinicius tan a siamsak a, Brazilian forward hian um lutin, tawih zetin goal-ah a chantir a, 2-0 in an chak.

Real tan lawmna

Madrid khaw club hian league match thum zet chu a zawnin hnehna an chang zo lo tawh. Rin loh takin Espanyol (1-0) an ngam lo a, a hnuah insiamṭha loin, Atletico Madrid (1-1) leh Osasuna (1-1) chu an draw.

Pathianni zanah erawh Real an chak ve leh ta a, nomawi chawi an la tum reng tih an pho nawn. Real lawmna belhchhah turin khup hliam vanga a chawlh reng hnuah David Alaba chuan bul a ṭan ve leh ta, Austrian defender hian ni 434 hnua inkhel bul a ṭan leh hmasak ber a ni.

Champions League aṭanga Manchester City pet chhuaktu Real hian February 27, Ningani zing dar 2:00-ah Copa del Rey semifinal an khel zui dawn a, Real Sociedad an lenchilh ang - semifinal lehlamah, Nilaini zing dar 2:00 hian Barcelona-in Atletico Madrid an mikhual dawn thung.