Napoli an chak lo

Serie A hmahruaitu nih leh theihna remchang nei mah se Napoli chuan an chhawr ṭangkai thei lo - Pathianni zan inkhelah Naples club hi kaithar Como lakah 2-1 in a chak lo.

Stadio Giuseppe Sinigaglia-a inkhelah goal kan hmu hma, minute sarihna lekah Napoli defender Amir Rrahmani chuan anmahni lamah a pet lut, goalkeeper Alex Meret chu lo tlan chhuakin goal sir lamah a awm si, ball hi goal lai zawnah kalin an lama a lut lai an en.

Chawlhlawk hmain forward Giacomo Raspadori chuan a sut - Como lamin holam taka an ball loh chu chang fuhin a tlanluh pui a, nuamsa takin goal a khung, team ṭha zawk an ni bawka chak tura rinkai an ni leh nghal.

Mahse, ni dang angin Napoli an vannei lo - Manchester United aṭanga an lak Scott McTominay chuan ṭha zetin pet mah se goal bar a per a, a hnuah Como forward Assane Diao chuan box pawn aṭangin chakna goal a khung ta zawk.

Napoli manager Antonio Conte chuan, "Keimahni lama goal kan khung khan min ti hrilhhai hle, a hnua kan beihlet danah erawh ka lawm. Como khan an khel ṭha, chutihrualin second half-a goal kan khung belh thei lo kha a pawi," tiin a sawi.

Como hi Arsenal captain hlui Cesc Fàbregas enkawl an ni a, tun season Serie A match 26 aṭanga point 28 hmuin 13-na an ni mek a, season thara Italian football inelna sang ber khel chhunzawm turin inhamtan an tum ngam ang.

Pathianni zan inkhel dangah Juventus an chak - Thiago Motta enkawl Old Lady hian striker Dusan Vlahovic goal khat hmang Cagliari chu 1-0 in an hneh. Champions League aṭanga an tlak hnu an match hmasa berah an chak, an tan chanchin lawmawm a ni.