Pep aia bul tan tha Ancelotti

Allianz Arena-ah Bayern Munich-in zanin dar 11:30 hian anmahni ang bawka 100% chak record nei Hertha Berlin an mikhual dawn a, Bundesliga inkhel hi Star Sports 2-ah a en theih ang.

Bayern Munich-in Carlo Ancelotti hnuaiah an khingpui an la hneh vek a, Manchester City ṭha taka bul ṭan puitu Pep Guardiola-a'n Bayern a enkawl ṭantirhin Italian manager bul ṭan dan hi a pha lo.

A zawnin vawi 6

Carlo Ancelotti hnuaiah Bayern Munich hi inelna hrang hrangah match ruk an chak tawh a, 1995-96 season khan German coach Otto Rehhagel hnuaiah hetiang record hi an lo nei tawh bawk.

Italian manager Ancelotti hian Pep Guardiola hmunruak kalsan a hnawhkhah avangin Bayern boss chanchin hian ngaihven a hlawh a, bul a ṭan dan erawh fakna tur hlir a la ni rih. Spanish manager Pep-a hnuaiah Bayern-in season thum chhungin German Super Cup an chawi miah lo a, Ancelotti erawhin Manchester City mana-ger lak theih loh nomawi hi Germany-a a nomawi chawi hmasak berah a hmang.

Bayern hian German Super Cup-a Dortmund hneh turin first half-ah goalkeeper Manuel Neuer ṭanpuina an mamawh a, second half-a Arturo Vidal leh Thomas Muller te goal hmangin Dortmund 2-0 in an hneh.

German Cup second round-ah erawh vawi 18 champion tawh Bayern-in fourth division club Carl Zeiss Jena chu 5-0 in an sawp a, Robert Lewandowski-a'n hattrick a siam. Bundesliga ṭan niah Werder Bremen chu 6-0 a sawp zuiin Lewandowski-a'n match zawnin hattrick a siam a; Xabi Alonso, Philipp Lahm leh Franck Ribery ten goal an khung bawk.

Champions League-ah vawi khat telna FC Rostov chu 5-0 in an sawp a, rawlthar duhawm Joshua Kimmich-a'n goal hnih khungin Lewandowski, Thomas Muller leh Juan Bernat ten goal an khung bawk. A zawna vawi ruk chak nan Ingolstadt chu 3-1 in an hneh a, goal chhuah hmasa mah se Lewandowski hmanga an siphurh an sut hnuah Alonso leh Rafinha te hmangin an khung belh. Hemi ṭum hian keeper Neuer a khel ṭha a, Bayern an chungnung bik lo.

Guardiola nena khaikhinin

Spanish manager Guardiola-a'n Bayern a enkawl hmasak berah tuna Liverpool coach ni ta Jurgen Klopp-a kaihhruai Borussia Dortmund chu 2-4 in German Cup-ah an hneh lo. Bundesliga-ah Borussia Monchengladbach, Eintracht Frankfurt leh Nuremberg te hneh nghal mah se Freiburg laka chungnung chungin Pep-a kaihhruai Bayern hian point khat chiah an hlawh chhuak. Match ruknaah erawh Pep hoten club tenau Schwarz-Weiss Rehden chu 5-0 in an sawp.

Match hmasa paruk aṭanga teh chuan Spanish manager Pep aiin Ancelotti-a'n bul a
ṭan ṭha zawk a, match sarihna chhiar tel a nih erawh chuan Guardiola-a'n UEFA Super Cup-ah Jose Mourinho enkawl Chelsea hnehin Bayern tana a nomawi hmasa ber a chawi lawi si. Barcelona manager hlui Guardiola hnuaiah Bayern-in Bundesliga an thunun season thum chhungin nomawi an chawi vek a, amaherawhchu knockout football-ah erawh a vanduai theih tih a chiang.

Guardiola hian Bayern hi game kalphung thar hlak khelhpui mah se Champions League-ah Barcelona, Real Madrid leh Atletico Madrid te semifinal-a hneh loin an tla a, German Super Cup vawi khat mah an chawi loh bakah German Cup (DFB-Pokal)-ah ṭum khat an vanduai bawk. Hei vang tak hian Champions League nomawi chawi lo Guar-diola hi Bayern-ah a hlawhchham tihin an sawi a, thlirna tlang dang aṭang chuan Ancelotti hian Pep-a record hi a khum thei nachungin Bayern hlawhchham (?) pui tur pawha a hmabak hi a la khirh khan hle.

Hriat tel atana ṭha chu Euro 2004-a Greece champion puitu manager Otto Rehhagel khan Bayern ṭha taka bul a ṭanpui ṭum khan season chawhnu lamah a khelh ṭhat loh avangin season khat a hmang zo lo.

Berlin nen

Bayern hian Hertha Berlin an hmachhawn hnuhnung vawi 10-ah hnehna an chang vek a, Bayern goalkeeper Manuel Neuer-a'n Hertha a hmachhawn hnuhnung 14 zinga 12-ah goal a chhuah lo.

Hei chauh hi a la ni lo, Robert Lewandowski-a'n Bayern tana a vawi khat nan a zawnin match nga chhung goal a khung tawh a, mahni muala khel tur Carlo Ancelotti hote hi chak rinkai an ni.