Japan-ah Srikanth

Rio Olympics mipa singles quarterfinalist Kidambi Srikanth chu tun kar chhunga khelh tur badminton inelna lar Japan Super Series-ah a inlan dawn. Inelna hi vawiin aṭang hian Tokyo Metropolitan Gymnasium-ah neih tur a ni a, Srikanth hi seeded pariatna a nih phak avangin second round aṭangin a inlan ang.

Kum 23-a upa Srikanth hi Rio-ah khan world cham-pion vawi nga ni tawh leh Olympic ṭum hnih champion ni thei Lin Dan hneh loin a tla a, hemi hnuah tun ṭum hi court-a a inlan lehna tur hmasa ber a ni.

Indian shuttler dang Parupalli Kashyap pawh Rs 2,01,10,635 inchuhna tournament-ah hian a inlan dawn. Commonwealth Games champion Kashyap hi player beiseiawm tak ni mah se hliamin a ti buai ngum deuh a, tunah rawn ṭha chhuak leh mekin Austria shuttler David Obernosterer a hmachhawn dawn.

Mipa singles khel tur zingah world number 18 Ajay Jayaram a inlawn dawn bawk a, ani hian Sony Dwi Kuncoro a hmachhawn dawn. B Sai Praneeth leh HS Prannoy te pawh he inelnaah hian an tel bawk.

Japan-ah hian Indian shuttler zingah hmeichhia inlan tur an awm lo a, Olympic silver medalist PV Sindhu-i'n chawlh a la mamawh a, world number 1 hlui Saina Nehwal erawh hliam vangin a la inkhel thei lo thung.