Nadal leh Farah an tel ve leh

Internet kaltlanga mi thil ruk thiam Russian hackers an hming atana "Fancy Bears" an tih ten infiammiten damdawi hman phal loh an hmang nge hmang lo tih endiktu World Anti-Doping Agency (WADA) thuruk an ruk hnuah infiammi langsar hming a lang chho zel a - Rafael Nadal leh Mo Farah te hming a lang tel ta.

Nikum kum tawp lam aṭangin WADA hian Russia lakah thubuai a siam a, Rio Olympic-ah an infiammi engemaw zat an inlan thei lo. Olympic a zawh hnuah buaina a inṭan dawn chauh niin a lang. September 13 khan WADA chuan Fancy Bears te hian an thuruk an lakchhuah thu an sawi.

Fancy Bears-in infiammite endikna result an rukchhuak zingah hian American star Venus leh Serena Williams te unau bakah Rio Olympic hmeichhe gymnastic-a gold pali la thei Simone Biles te pawh an tel. Khawthlang media-te chuan Fancy Bears thil tih zingah hian Britain athlete 53 zet an tel niin an sawi. Heng pawikhawihtute hian mimal hming lam ri mah se tun thengin mipui hmuhah an result erawh an la tarlang lo thung.

Grand Slam vawi 14 champion tawh Nadal chuan, "Hei chu thuthar a ni lo, thil pakhat ve mai a ni. Tun hma lam aṭanga ka lo sawi fo tawh angin infiamna khawvel hian bungthar a kai a ngai a, engkim hi langtlang leh fiah taka tih a pawimawh," tiin a sawi.

Spain tlangval Nadal hian Bei-jing Olympic-ah khan mipa singles-ah gold medal a lo la tawh a, kuminah khan doubles-ah gold a dawng bawk. Nadal hian damdawi hman phal loh a hman leh hman loh endik a nihna result chu mipui hmaa puanzar a ngam thu a lo sawi tawh nghe nghe.

Britian long distance runner Farah thupuangtu chuan hlauhthawn tur an neih loh thu leh engkim langtlang taka an kalpui avangin buaina tur an neih loh thu a lo sawi ve bawk. Kum 33-a upa Farah hian Olympic hnuhnung pahnih London leh Rio-ah te khan 5,000m leh10,000m intlansiakah gold a dawng.