FIFA leh Ballon d'Or inṭhen

Khawvela football thuneitu sang ber FIFA chuan khawvela footballer thiam ber thlang tura France chanchinbu lar 'France Football' nena an thawhdunna chu an titawp. FIFA-in tun hma angin World Player of the Year a kalpui eh ang a, France Football kaihhruaiin Ballon d'Or a kal zel bawk ang.

France Football hian kum 1956 aṭang khan Ballon d'Or chawimawina hi an lo sem tawh ṭhin a, kum 2009 thleng khan semin FIFA nen an thawhdun hma hi chuan Europe-a inkhel player
ṭha ber hnenah pek a ni ṭhin. Kum 2009-a FIFA nen an thawhdun hnuah FIFA Ballon d'Or tih niin khawvela footballer ṭha ber hnenah pek a ni ṭhin.

FIFA hian kum 1991-2009 inkara an lo sem tawh World Player of the Year chu an sem leh dawn a, hmalak dan tur kimchang erawh puanzar a la ni lo thung. FIFA Ballon d'Or hi ṭum ruk sem hman niin Lionel Messi chuan he chawimawina hi vawi li a dawng a, Cristiano Ronaldo chuan vawi hnih a dawng ve bawk.

Kum 2007 khan Brazilian midfielder Kaka chu Ballon d'Or leh FIFA World Player of the Year chawimawina pek a ni a, heng chawimawina pahnih huanga Messi emaw Ronaldo hming a lan loh hnuhnung ber a ni.

Nimin khan France Football lam chuan Ballon d'Or kalpui zel a nih dan tur chungchang an puang nghal a, kalphung thar duan nual a ni. Chawimawina hi khawvel huap journalist ten an thlang tawh ṭhin ang a, FIFA nen an thawhdun lai angin national team captain leh coach ten vote an nei tawh dawn lo.

Player 23 hming chhawpchhuah ṭhin
aṭangin player 30 hming chhawpchhuah a ni tawh bawk ang a, top three awm tawh loin chawimawina dawng tur hi kum tawp hmaa puan zel tur a ni tawh dawn bawk. FIFA leh France Football thawh ho chhung hian footballer ṭha ber chawimawina hi January thlaa sem ṭhin niin an inṭhen hnua Ballon d'Or chawimawina sem hmasak ber turah erawh FIFA an inrawlh tawh lo ang.