Higuain vangin Allegri insawifiah

Juventus manager Massimiliano Allegri chuan kartawp Serie A inkhelah pound maktaduai 75.3 man Argentina striker Gonzalo Higuain bench-a a ṭhuttir chu a tihsual a nih loh thu leh an ruahman dan a nih zawk thu a sawi.

Italian champion Juve hi Inter Milan lakah 2-1 in an tlawm a, he inkhelah hian nipui laia Napoli
aṭanga manto taka an lakluh Higuain hi bench-ah ṭhuttir niin minute 74-naah luhtir chauh a ni - Turin club hi tun season-a a vawi khat nan league-ah an chak lo.

Kum 49-a upa Allegri chuan, "Tharum hman a ngaih tam hunah Higuain kan mamawh a, chutih hunah chuan kan dahlut reng a ni. Inter kan hneh loh ṭum khan Mario Mandzukic kha khelhtir lo ni ila, ka khelhtir loh chhan min zawt tho ang. Ka ngaihdan chuan player 11 bul ka ṭan tir te kha a dik," tiin a player thlan chungchangah tihsual a neih loh thu a sawi.

Season hmasa Serie A top scorer hi nipui chawlh hnuah a fitness a la
ṭha tawk lo nia sawi a ni a, sawiseltu ṭhenkhat chuan 'thau' an ti bawk. Tun season league match li an khelh tawhah goal thum khung tawh mah se ṭum khat chiah inkhel bulṭan tura thlan chhuah zingah a la tel.

Juve hian an striker an chhuhsak Napoli chu tunah hian league teble-ah point khatin an phak lo mek a, zanin dar 12:15 hian Juventus Stadium-ah Cagliari an lo mikhual ang.