Barca VS Atletico Goal khung thiam Goal ven thiam

Zanin dar 1:30-ah Barcelona-in khual duhawm lo an nei dawn a, La Liga nomawi chawi tura an elpui zinga mi Atletico Madrid an mikhual dawn. Team pahnih hi tun hnaia harhtharna chang ve ve an ni a, an duh aia hmain an intawng ve vein a rinawm.

Barcelona-in beisei loh taka kaithar Alaves an ngam loh hnuah an insiamṭha leh tawh a, Champions League-ah Celtic chu 7-0 a sawp nghalin Leganes chu khualmualah 5-1 in an sawp bawk a, goal khung an harsat loh zia hi hrilh nawn kan ngai lo.

Atletcio Madrid-in beisei angin season an ṭan bik lo. An league match hmasa pa-hnihah Alaves leh Leganes inhnehtawkpuiin an mutthluk chhung erawh a rei lo. Celta Vigo khelmualah 4-0 a an thawh hnuah Sporting Gijon chu 5-0 in an sawp leh tawh a, goal venthiam anga hriat hlawh ṭhin Diego Simeone-a naute hian goal khung lamah pawh harsatna an nei lo tih an pholang tawh.

Barcelona leh Atletico tana chanchin hriat nuam lo tur chu Real Madrid an tawlhthlu ve duh lo hi a ni. Zinedine Zidane-a naute hian league match li an khelh tawhah hnehna chang vekin hma an hruai mek a, zanin dar 11:30-ah Villarreal an mikhual dawn. Barca leh Atletico tan Real kaltluan laia tawlh thluk nawn a chi dawn loh a, zaninah team pahnihin chak zawk nih tumin an khel ang.

Intawn vawi kuana

Khawvela manager langsar hming lamrik a nihin Barcelona manager Luis Enrique leh Atletico Madrid boss Diego Simeone-a te hming lam tel loh chuan a kim tawh lo a, manager pahnih hi khelmualah vawi riat zet an intawng tawh.

Manager pahnih an intawn tawhnaah chiang takin Enrique a chungnung zawk a, vawi sarih hnehna a chang thei. Mahse, season hmasa khan Ar-gentine manager Diego Simeone-a'n Barca fan-te hnen-ah an hriatreng tawh tur thil a hnutchhiah a, Champions League quarterfinal aṭangin Catalan club hi a hnawt chhuak.

Treble champion nih beisei Barca hi La Liga leh Copa del rey-ah an lungawi a ṭul a, zaninah phuba lak duhna thinlung nen Atletico an lo mikhual ang.

MSN

Barcelona-in tlarhmaah khawvela forward inkawp fuh bera an sawi Lionel Messi, Luis Suarez leh Neymar an nei a, tun season-a MSN goal khung belhkhawm hi goal 17 a tling leh der tawh! An pathuma an match khelh zat belhkhawm hi match 16 niin vawi 12 assist an nei tel bawk.

Messi-a'n tun season-ah inelna hrang hrangah match sarih khelin goal riat a khung leh der tawh a, a ṭhiante thun tur a siamsak zat hi vawi nga a ni. Suarez-a'n match ruk khel tawhin goal sarih a khung a, assist vawi thum a nei. Olympic football khelh vangin Neymar-a'n match thum chauh la khel mah se goal hnih khungin assist vawi li a nei leh der tawh bawk.

Khawvela tlarhma inkawp fuh bera chhal ngam dang turin Atletico hian tlarhnung lamah Stefan Savic, Juanfran, Diego Godin leh Filipe Luis te an nei a, tun season-a goal khat chiah la chhuah tlarhnung hmaah MSN an vul zo dawn em? tih chu hriat chakawm tak a ni.

Atletico Madrid defender Diego Godin chuan, "Chawl hahdam hman loin Barcelona kan hmachhawn dawn a, an khelmualah tum an harsat ṭhin avangin kan theihna zawng zawng kan pek a ngai dawn. Barca hi tlarhma mai ni loin tlarhnung lamah pawh an ṭha em em a ni," tiin an khingpui tur chungchang a sawi lawk.

GGT?

Barcelona-in tlarhmaah MSN an nei a, Atletico Madrid fan-te inchhuanna tur chu tlarhmaa Antoine Griezmann, Kevin Gameiro leh Fernando Torres an nei ve tho hi a ni - striker pathum hian tun season-ah goal riat an khung tawh.

France international Griez-mann-a'n tun season-ah match thum chiah a la khel chungin goal li a khung leh der tawh a, Sevilla aṭanga an lakluh striker Kevin Gameiro chuan match li aṭangin goal hnih a khung tawh bawk. Fernando Torres-a'n Liverpool-a a vanglai phak tawh lo mah se striker hlauhawm tak a la ni reng tih pholangin an league match hnuhnung berah goal hnih a khung bawk.

Atletico tlarhma hi MSN nen meuha khaikhin tur chuan an ṭha tawk lo a ni mai thei a, mah se Nou Camp-a Barcelona tlarhnung ṭhiat turin an ṭha tawk tihah erawh inhnialna tur a awm lo.