Mark Hughes pawisa chawitir

England-a football thuneitu sang Football Association chuan Stoke manager Mark Hughes chu £8,000 (Rs 6,99,072.42) an chawitir.

September 10 khan Stoke hi Tottenham chuan 4-0 in an sawp a, hemi ṭum hian Stoke forward Marko Arnautovic chu tlu der tia yellow card pek a nih duh loin Hughes hian a thinrimna a lantir nasat avangin hnawhchhuah a ni.

Stoke hian season bul an ṭan fuh lo hle a, league match nga an khelh tawhah vawi li chak loin ṭum khat chu an khingpuite nen an in-hnehtawk a, point khat hmuin table mawngphahah an awm mek.