Lukaku chelh kan duh - Koeman

Everton manager manager Ronald Koeman chuan tun hnaia cheṭha tak striker Romelu Lukaku chu chhuahtir an tum loh thu leh Goodison Park-a hun rei zawk cham chhunzawm tura contract ziahpui an duh thu a sawi.

Belgium international Lukaku hi tun hnaiah a khel ṭha takzet a, ram leh club tan a match hnuhnung parukah goal ruk khungin kartawp khan Middlesbrough lakah a club hi 3-1 a hnehna chanpuiin Premier League-ah hneh loh nei loin an kaltluang mek.

Chelsea striker hlui hian tharum a ngahin khingpuite tlarhnung a chhaih buai thei hle a, nipui transfer lai pawh khan Manceshter United leh German champion Bayern Munich ten an duh nia sawi a ni, hetihlai hian Lukaku agent Mino Raiola chuan Everton nen contract thar ziak tura inbiakna an neih tluan thu a sawi - Toffes fan-te tan chanchin lawmawm a ni ngei ang le.

Koeman chuan, "Club hian kan player ṭha berte ṭheuh chu chelh kan duh vek. Lukaku chelh hi thil awlsam ni lo mah se Everton chuan a tum. Nipui chawlh hnua a lo kir leh hian tun hma lama a neih sa aia nasain inrintawkna a nei a, hma hun engtak a nei mek," tiin a sawi.

Kum 23-upa striker hian kartawpa Middlesbrough an hneh ṭum khan a kezungṭang a ti na a, September 24 zana Bournemouth an lenchilh hunah chuan a inkhel thei leh tawh mai thei.