Champion lai City khingpui tur Swansea

Manuel Pellegrini kaih-hruaina hnuaiah Manchester City chu English Football League Cup (EFL Cup)-ah an champion a, nomawi humin tura an khingpui hmasa ber chu Premier League club Swansea a ni.

Premier League club zingah City chiahin tun season-ah 100% chak record an nei a, Pep Guardiola pawhin an result chu a beisei aia a ṭhat thu a sawi. Spanish manager chuan, "Season kan la ṭan chauh chunga
ṭha tak maia kan khel thei hi keipawhin mak ka ti. Ka player-te hian kan khingpuite aiin goal khung theihna chance an insiam hnem a, kan khingpuite tlarhnung aia kan tlarhnung an hahdam zawk ṭhin hi a lawmawm lai chu a ni," tiin goal khung ang thoa goal venhim a ngaih pawimawh thu a sawi.

Pep Guardiola hian City a enkawl hmain Bayern Munich leh Barcelona te chu game hmuhnawm tak a khelhtir tawh a, Spanish manager hian team ṭha tak pawh din se nomawi a chawi loh theih tih a hrechiang.

Champions League-a Bayern champion pui thei lotu coach Guardiola chuan, "Ka hlimna hi nomawi chawi theih zawng zawng kan chawi leh chawi loah a innghat lo. Tuna ka hmachhawp chu nitina hlim theih hi a ni a, League Cup-ah chak kan tum lo tihna lam a ni lo. Swansea hneh hi kan tum a, nomawi kan chawi theih dawn leh dawn loh chu inkhelh zawhah kan hria ang," tiin a sawi.

Premier League-a 15-na ni mek Swansea-in Manchester City an mikhual hunah hian inhliam vanga hun rei tak chawl tawh captain Vincent Kompany-a'n inkhel bul a ṭan a rinawm a, David Silva erawh a khelh hman a rinawm loh avangin Germany midfielder Ilkay Gundogan-a'n a zawnin match thum inkhel bul a ṭan beisei a ni.

Borussia Dortmund mid-fielder hlui Ilkay Gundogan chuan Liverpool boss Jurgen Klopp thurawn a lak hnuah chauh Premier League club zawm tura thutlukna a siam thu a sawi a, City midfielder Gundogan leh a pu hlui Klopp ten season bul an la
ṭan ṭha rih hle.

Pep-a hnuaia City

0 Champions League match thumah goal an chhuah lo (Playoff match hnih telin)

3 Premier League-ah Kevin De Bruyne leh Kelechi Iheanacho te vawi thum ve ve assist an nei tawh a, West Ham midfielder Dmitiri Payet leh Arsenal winger Alex Iwobi te nen assist ngah ber an ni.

4 Premier League club zinga woodwork (goal ban leh crossbar) vawi li tih per tawhin anni aia tih per ngun an awm lo.

9 Tun season hi Premier League match hmasa panga a zawna chak ṭum kua a thlenna chiah a ni a, City hian Pep Guardiola hnuaiah inelna hrang hrangah vawi riat hnehna an chang tawh.

9 Sergio Aguero-a'n match nga inlan lekah goal kua a khung tawh.

9 Raheem Sterling-a'n goal thum a khung bakah assist vawi ruk a nei tawh a, season liam ta khan tuna a khelh zatah chiah hian English winger hian assist vawi khat bakah goal khat a khung.

13 Premier League-ah box chhung aṭanga goal khung tam ber an ni.

15 Premier League hmasa pangaah goal 15 an khung a, Arsenal aiin goal thumin an khung tam.

61 City ball possession hi chawhrualin 61% a ni a, an hnuai chiaha awm Chelsea-in 56.9% ball possession an nei ve bawk.

64.1 Mahni mualah bik City-in chawhrualin ball possession 64.1% an nei a, Liverpool (60.3%) in an dawt.

75 Claudio Bravo-a'n 75% pass accuracy a nei a, Tottenham keeper Hugo Lloris chiah a tluk lo.

85 City-in 85% pass accuracy an nei a, an tluk loh chu Chelsea (86.6 %) leh Arsenal (85.2%).

570.7 Premier League-a City player tlan zat chu 570.7 kilometres a ni a, an tluk loh chu Liverpool chiah a ni.

2,945 Premier League-a City player-te ball inpek kual zat chu 2,945 a, Pep-a naute tluk pha an awm lo.