United tan insiamṭhat hun?

Manchester United-in ni kaw chhung leka Manchester City, Feye-noord leh Watford te an hneh loh avangin an mualpho a, Jose Mou-rinho hoten Inrinni tlaia Premier League champion lai Leicester City an mikhual hmain insiamṭhatna tur hun ṭha an nei. Zanin dar 12:15 hian English Football League Cup (EFL)-ah League One club Northampton an tlawh dawn.

Northampton hi season liam ta khan League Two champion an ni a, tunah hian League One table-ah 11-naah an awm mek. Inrinni khan Northampton hian Chesterfield chu 1-3 in an hneh lo a, nikum December thla aṭanga hneh loh nei loa an kaltluang tawh chu tihtawp a ni. Manager Rob Page chuan, "United nena kan inkhelh hun hi kan nghakhlel tawh hle. Kan hmalam hun hi a êng zawngin kan thlir a, Manchester mikhual turin kan inpeih ang," tiin chak beiseina nei chunga an khelh tur thu a sawi.

Manchester United manager Jose Mourinho chuan Paul Pogba, David de Gea leh Eric Bailly te a awltir a rinawm a, squad a chhah avangin rawlthar duhawm Axel Tuanzebe bakah reserve team player dangte an khelh an rinawm loh.

Senior squad-a telpha zingah Sergio Romero, Timothy Fosu-Mensah, Memphis leh Ashley Young ten inkhel bul an la ṭan lo a, Michael Carrick pawh Community Shield-a inkhel bul a ṭan hnuah starting eleven a la chang leh lo.

United captain Wayne Rooney a khelh ṭhat loh avangin sawisel a hlawh cho a, Watford lama goal khungtu Marcus Rashford chuan United Review-in an kawm ṭumin striker hnung chiahah (No. 10) pawh a khelh theih thu a lo sawi ve bawk.