AFC Cup Rovers khelmualah Bengaluru

I League champion Benga-luru chuan vawiin tlai dar 5:00 hian AFC Cup quarterfinal second leg khel turin Tampines Rovers an lenchilh dawn a, Singapore club hi inkhel hmasa zawkah 1-0 a an hneh tawh avangin inrintawkna nasa tak nen Singapore an pan ang - inkhel hi Star Sports 4 chuan live-in a pe chhuak dawn a ni.

India sulhnu

Asian football-ah India club ten sulhnu ropui sawi tur an nei tam lo hle. Kum 2008 khan Goan club ṭha Dempo SC chuan semifinal lo khel tawhin India club zinga AFC Cup-a a thiam pali zinga tel thei hmasa ber an ni a, Armando Colaco-a naute hian Lebanese club ṭha Al-Safa chu 5-1 ngawtin an hneh lo.

Kum 2013 khan East Bengal chuan semifinal lut ve lehin Al-Kuwait chu inkhel pahnih belhkhawmah 7-2 in an hneh lo a, he inelnaah hian Mizo tlangval Lalrindika Ralte chuan goal li khungin AFC Cup tournament khata Indian player goal khung hnem ber dinhmun Baichung Bhutia lo chelh tawh chu a nihrual.

Didika leh Baichung record inṭawm thaichhetu pawh Mizo tlangval tho a ni a, kuminah Mohun Bagan-in last 16 bak thleng zo lo mah se Jeje Lalpekhlua'n goal ruk lai khungin AFC Cup tournament khata Indian player goal khung hnem ber a ni.

Kum 2013-a din ve chauh Bengaluru-in Indian football-ah sulhnu ropui tak nei tawh mah se AFC lamah erawh inchhuanna tur an nei lo a, kumin hi quarterfinal an luhna hmasa ber a ni. Indian football tana history ziak turin Bangalore club-in hun ṭha an nei a, an kutah engkim a innghat.

Chhetri a zam lo

Bengaluru FC captain Su-nil Chhetri chuan, "Kan khelmualah hnehna kan chan tawh avangin kan dinhmun a ṭha hle. Singapore-ah game harsa tak kan nei tih ka hria a, mahse huaisen takin kan bei dawn a ni," tiin semifinal luh ngei an tum thu a sawi.

Barcelona assistant manager hlui Albert Roca-a'n first leg-ah Mizo tlangval Lalchhuanmawia Ralte chu substitute bench
aṭangin a tlan luhtir a, Lengpui tlangval hian vawiinah erawh inkhel bul a ṭan tawh beisei a ni.

Mizo tlangval zingah mid-fielder Malsawmzuala, striker Daniel Lalhlimpuia, winger Beikhokhei Beingaichho leh goalkeeper Lalthuammawia Ralte-te chuan match hmasa ang thoin bench lamah hun an hman a rinawm thung.

Tampine Rovers hian tlar-hmaah Liverpool winger hlui Jermaine Pennant, Canadian winger Jordan Webb leh West Ham academy chhuak striker Billy Mehmet te an kawl a, Benga-luru tlarhnung tan hna-thawh tur a awm nualin a rinawm.