A vawi khat nan Juve an tlawm

Cristiano Ronaldo awmna Juventus chu tun season Serie A bikah a vawi khat nan an tlawm. Player 10 a khel Old Lady hi an mikhual 

Fiorentina lakah 3-0 in an chak lo.

Thawhlehni zan Allianz Arena a inkhelah Juan Cuadrado chu Gaetano Castrovilli laka a foul vangin minute 18-naah hnawh chhuah a ni a, hetih lai hian Juve lam hian goal khat an phur tawh.

Mikhual Fiorentina tan Dusan Vlahovic-a'n minute thumna lekah goal hmahruai a khung a, second half-ah Lobo Silva chuan an mahni lamah a tih luh bakah, hun tawp dawnah Martin Caceres-a'n chak nemnghehna goal a khung.

Juve an chak lo a, hei bakah hian chanchin lawmawm lo dang an nei. Point thum an neihsa chu chhuhsak let leh an ni a, table-ah palina niin hmahruaitu AC Milan an phak lohna chu point sarih a ni.

October thla khan Juve hi Napoli nen inkhel tur an ni. Mahse Naples khawpui thuneitu lamin Covid-19 vangin Napoli hi zin chhuah an phal lo a, an inkhel thei ve ta lo.

Juve chu inkhel turin khelmualah an kal a, an khingpui an inlan loh avang hian 3-0 a chakah puan niin point thum an pe. Inlan lo Napoli hi chak loa puan an nih bakah point an hmuhsa atangin point khat an paihsak bawk.

Napoli hian an chunga thil thleng hi Italian Olympic Committee (CONI) hnenah an thlen a, Italy rama infiamna lam thuneitu sang hian match khelh theih loh chu khelh that leh turin an ti a, point an peksa an laklet bakah point an paihsak chu a pe let bawk a ni.