Spain-ah India U17 captain hlui

India Under 17 captain hlui Deependra Singh Negi chuan Spanish second division club CF Reus tana khel turin professional contract a ziak a, Indian rawlthar midfielder hian Reus U19 training chu a zawm nghal.

February 2016 khan Deependra hian La Liga club Espanyol-ah trial a lo nei tawh a, second division club Gimnastic de Tarragona-ah trial a nei bawk. Gimnastic hian Indian rawlthar hi lakluh tumin thutlukna siam tawh mah se coaching staff an insiksawi leh thut avangin Deependra hian Gimnastic hi zawm loin Reus lamah hian ni 10 chhung trial a nei leh ta zawk a, contract an ziahpui ta hial a ni.

Kum 17-a upa mid-fielder hian thla thara kum 18 a tlin hunah U19 tan a match hmasa ber a khel ang a, tun season chhung ngeiin senior team tana a inlan hman an beisei thu a lamhnaite chuan an sawi.

Deependra agent Ravi Daswani chuan kum-in kumtir lam khan, "Deependra hian hmun hrang hrangah trial a nei a, a kalna apiangah coach-te mit a tlun ṭhin avangin Spain-ah hian a khel dawn tih ka chiang a ni," tiin a lo sawi tawh.