Unaupa zara footballer ngar ngar!
Crystal Palace-in an club player manto ber ni tura Christian Benteke an lakluh khan pound maktaduai 32 an inseng satliah lo - Belgian striker unaupa Jonathan Benteke chu an lakluh tel ve a ṭul!
Kum 21-a upa striker hian season hmasa khan Belgian Pro League club S.V. Zulte Waregem tan khelin vawi 17 inlanah goal a khung miah lo a, heng zinga vawi 16 hi chu bench aṭangin a tlan lut. Palace-in Belgian league-ah pawh a 'thiam lo pawl' striker hi an awt hauh lo ang. Mahse, a u an hmin theih nan an lakluh ve a ṭul miau si a, kum khat chhung atan contract an ziahpui.
Football khawvelah Benteke unau tawn ang hi a lo thleng zeuh zeuh tawh a, Europe club lian ten an player awh zawng lakluh nan an unaute contract an ziahpui fo - hetianga contract an ziahpui chhan hi player-te an lunglen loh nan te, mahni in ang maia nuam ti taka an khelh theih nan te a ni.
Roque & Julio Santa Cruz
Blackburn Rovers striker ṭhin Roque Santa Cruz kha ila hria em? Bayern Munich-a season riat a hman hnua Rovers zawmtu, a season hmasa bera league goal 19 tehmeuh khung nghaltu kha. Balckburn hian Roque hmin tur hian sum an seng satliah lo, kum 2008-ah a unaupa Julio Santa Cruz pawh an lalut a, a unaupa hlawhtlinna ang erawh a chhar pha lo - Balckburn senior team tan vawi khat chiah inlanin club reserve team-ah pawh hmun a chang pha meuh lo!
Clarence & Chedric Seedorf
AC Milan ropui vanglai sawi apiangin Clarence Seedorf hi mitthlaah a lo lang ṭhin. Dutch legend hian Ajax-a Champions League nomawi a chawi hnua kum 1996-a Real Madrid a zawm dawn khan ken tel a nei a, chu chu a unaupa Chedric Seedorf a ni. Clarence Seedorf-a'n Real-ah season li hmanga Champions League nomawi pahnih lai a chawi laiin Chedric erawh youth academy-ah awmin tunah hian club khelhna nei loin a awm mek!
Rafael & Fabio da Silva
Manchester United ṭantu tan Brazilian defender unau hi hriat loh chi an ni lo. Rafael -a'n Red Devils tan match 170 khel hmanin kum 2015 khan Lyon a zawm a, a phirpui Fabio erawh vawi 56 chiah inlan hmanin kum 2012 khan QPR-ah loan-a chhuahtir a ni a, kum 2014-ah a ngheta Cardiff City zawmin nipui transfer lai khan Premier League kaithar Middlesbrough a zawm.
Kaka & Digao
Khawvela footballer ropui sawi an nih apiangin Kaka hming lam hmaih a ni ngai lo. Brazilian midfielder hian kum 2003 khan Sao Paulo aṭangin Milan a zawm a, a hnu kum khatah a unaupa Digao chu a lunglen hnem turin Serie A club hian an lalut ve leh. Kaka-a'n Milan legend dinhmun hial a hauh laiin a unaupa erawh senior team tan vawi khat chiah a inlan a, kum 2013 khan kum 27 chauha upa nichungin inkhelh a chawlhsan.
Eden & Thorgan Hazard
English football ngainatu tan Eden Hazard hriat loh chi a ni lo a, a unaupa Thorgan i hre lo a nih erawh chuan i thiam loh pawh a ni bik lo! Kum 2012 khan Stamford Bridge lamah a unaupa a zui a, senior team tan pawh match khat a khelh hmain Belgium lamah loan-in a chhuak a, nikum khan a nghetin Borussia Monchengladbach a zawm. "Tunah chuan tumahin Eden Hazard unaupa min ti tawh ngai lo," tiin a sawi a, Thorgan hi Bundesliga lamah player hmuhnawm pawl a ni mek.
Paolo & Fabio Cannavaro
Nula te atchilh, World Cup champion team captain chutiang unaupa chu nei ta la, a lar lo zawk i nih chance chu sang tak a ni. Inter Milan, Juventus leh Real Madrid defender hlui Fabio Cannavaro-a'n Parma tan a khelh lai kum 1999 khan football khawvela la mikhual tak a unaupa Paolo Cannavaro chu an team-a khel turin a hruai lut a, Parma-in an tisual lo.
Season sarih chhung Italian club tan hian khelin UEFA Cup semifinal hial captain nichungin a hruai thleng a, a hnuah Parma a zawm hmaa match hnih pawh a khelh phak lohna Napoli lamah kirin season riat a cham a, tunah hian kum 35-a upa ni tawh chungin Serie A club Sassuolo a zawm.